NASA: Nave espacial Juno a drenta orbita di Jupiter exitosamente!

NASA - Despues di un biahe di casi 5 aña pa e planeta mas grandi di e sistema solar, Jupiter, NASA su nave espacial Juno exitosamente a drenta e orbita di Jupiter. Aruba su representante orguyoso na NASA, Edward Cheung awe mainta a mustra su sentimento riba su pagina di facebook. "Orguyoso di ta parti di e famia di NASA awe mainta! Go Juno!"

CELEBRACION DIA DI INDEPENDENCIA

Tabata un momento historico y cu el a pasa riba dia di independencia di Merca a haci'e aun mas special. "Juno ta na Jupiter" e administrador di NASA Charlie Bolden a bisa. "Cu Juno nos lo investiga e faya masivo di radiacion di Jupiter, sa con el a nace y con nos sistema solar a evoluciona". 

COMENTARIO DI EDWARD CHEUNG

Den un prome comentario pa NoticiaCla.com, Edward Cheung a bisa "Jupiter ta asina grandi cu e ta provee un bistaso chikito di un manera completamente diferente con un planeta ta hinca den otro. Su gravedad super halto y su campo magnetico intenso ta fascinante y lo ta yen di discubrimento" Cheung a bisa."Tambe, no lubida cu "Europa", un di su lunanan tin un oceano likido grandi. Ken sa kico tin eyden!" Cheung a finalisa bisando. 

TENSION PROME

Manera cu NoticiaCla.com a raporta dialuna anochi, tension tabata halto pa sa si enberdad e trabou a logra. E intencion tabata pa ayera nochi 11:18 pm ora di Aruba e nave drenta den orbita. Unabes den e orbita, e por saca potret y busca data importante pa haya sa mas di e planeta aki. Pero si e no a logra drenta e orbita den su prome intento, elo a bandona esaki y keda bula afo. Tin un retraso di casi 50 minuut di comunicacion cu e nave y como tal e nave mes tin cu atende cu e entrada den e orbita di Jupiter. E proyecto aki a costa 1.1 biyon dollar y ta un di e proyectonan mas interesante porta di NASA desde e aterisahe riba luna, y e transbordador espacial. Foto cortesia NASA.