Wever: Retiro Desiree Croes di politica ta pa falta di liderazgo di Mike Eman

ORANJESTAD - Reaccion di fraccion di MEP den Parlamento riba retiro di parlamentario di AVP Desiree de Sousa tabata liher. Diamars mainta lider di fraccion y di partido MEP Evelyn Croes a mustra cu esaki ta falta di liderazgo di Mike Eman, lider di partido AVP y actual prome minister di Aruba. "Relaciona cu e anuncio di sra Desiree Croes cu e lo retira di politica, mi mester bisa cu ta di dos parlamentario cu ta bandona AVP den menos di un luna y ambos ta debi na falta di liderazgo di sr. Mike Eman"

FALTA DI SOSTEN

Segun Wever, den ambos caso e parlamentarionan no a sinti cu di parti di liderazgo di partido nan a haya e sosten den locual nan a trece padilanti. "Mi mester enfatisa cu te e dia di awe nos di MEP no sa kiko ta locual sra. Desiree Croes kier a bin cune. Parlamento no a ricibi nada tampoco di sra. Desiree Croes. Awor nos ta mira un otro parlamentario ta anuncia su retiro, debi na falta di liderasgo. Si sr. Eman a mustra liderazgo, lo e discusion y debate publico tocante e "amienda di Desiree" no a bay di e forma aki" Wever a sigui bisa. Segun e politico di fraccion geel, e ta referi na e debate publico riba e amienda lo ta uno cu a ranca famia y amigonan for di otro. Un debate cu a crea odio y desunion den nos comunidad. Un debate cu a laga heridanan hundo habri."  Awor cu sra Desiree Croes a anuncia su retiro, no ta kita tur e dolor y ansha cu a wordo causa cerca esnan cu ta na fabor ni esnan cu ta en contra di su pensamentonan. Henter un pueblo a wordo lastra den un discusion cu na prome lugar mester a wordo hiba paden den partido AVP. Y eynan sr. Mike Eman a bolbe faya, mescos cu ela faya cu sra. Lopez-Tromp y mescos cu ela faya cu henter e comunidad di Aruba" Wever a sigui bisa. 

MESTER TRATA E TEMA CU RESPET

Segun Wever, e tema aki ta un tema delicado y semper mester wordo trata cu respet, tanto pa esnan cu ta na fabor como pa esnan cu ta en contra. "E forma con AVP a scoge pa trata e tema aki no ta corecto y mi ta spera cu nan reconsidera esaki. Mi ta lamenta cu e prome minister di e pais aki ta faya nos pueblo di e forma aki, mi ta lamenta mas ainda cu ela permiti tanto odio wordo sembra den nos comunidad. Cu Dios guia nos y bendiciona nos dushi pais Aruba" Wever ta finalisa bisando.