Pastoornan: Matrimonio mesun sexo no ta asunto di derecho humano sino asunto di moralidad

ORANJESTAD - Matrimonio di mesun sexo no ta un asunto di derecho humano, e ta un asunto di moralidad. Asina un carta habri di Comision di Pastoornan di Iglesianan Cristian na Aruba, publica den medionan di prensa local a bisa. E carta ta repasa eleccion di aña pasa unda cu un partido cu a promove matrimonio di mesun sexo a keda rechasa durante e eleccion ey. Tambe ta relata riba un candidato di 'otro partido' cu tambe a promove e mesun tema, y a drenta parlamento sin voto preferencial sino 'a base di voto di personanan cu no a promove matrimonio di mesun sexo'. 

DEMOCRACIA REPRESENTATIVO

Segun e carta, e comision di pastoor ta mustra Parlamento cu miembronan di parlamento ta representa interes di pueblo di Aruba. "Si e pueblo votador di Aruba no a vota masalmente pa esnan cu tabata promove matrimonio di e mesun sexo, anto pueblo su representante den Parlamento no tin e autoridad moral pa trece e punto aki riba agenda". 

DERECHO HUMANO

E carta ta mustra specificamente riba e tema di homosexualidad y si un persona a nace homosexual of na caminda a bira esey. "No tin ningun prueba cu cientifico cu hende ta nace homosexual" e pastoornan ta bisa. E relacion entre dos persona di mesun sexo ta un escohencia segun e carta habri di e pastoornan. Ademas ta mustra cu matrimonio di mesun sexo no ta un asunto di derecho humano sino un asunto di moralidad. "Corte Europeo di derecho humano na juni 2016 a bolbe dicta cu matrimonio di mesun sexo no ta un derecho humano". Segun e pastoornan, na Aruba esnan cu ta uza e argumento di derecho humano pa legalisa matrimonio di mesun sexo, ta uzando manipulacion pa gana simpatia di pueblo. 

CODIGO CIVIL NOBO

Pa loke ta e codigo civil nobo, e pastoornan ta mustra cu un amienda chikito, Parlamento por inclui parehanan di e mesun sexo den e ley aki. "Si Parlamento bay di acuerdo cu e amienda aki, esey kiermen cu matrimonio di mesun (sexo) ta bira legal na Aruba. Si Parlamento na fabor di cualkier forma habri of scondi pa aproba matrimonio di mesun sexo, nos Parlamento lo haci un deshonor grandi na e pueblo cu e ta representa y na Dios kende a insititui autoridad di un pais", e carta ta sigui bisa. Foto cortesia law.rwu.edu.