Kolader: Corsou ta surpasa Aruba den lider di energia berde

WILLEMSTAD - Mientras cu na Aruba cos ta pega cu e di dos parke di molina pa motibo di e.o. localidad, Corsou ta cla pa añadi mas molina di biento. De hecho, nan ta profila awor cu nan ta 'pasa Aruba' como lider den energia berde den Caribe. Asina director di e compania NuCapital na Corsou Roy Kolader a declara den e matutino Antiliaans Dagblad (AD) diamars. Cu un inversion di 36 miyon dollar, e parke existente ta añadi 5 molina cu mester ta operacional pa april di 2017 na Tera Kora.  

SURPASA ARUBA DEN CAPACIDAD

E capacidad di e 5 molinanan lo ta 16.5 mw. Pa cu expansion di e parke di molina, a lanta e compania NuCuraçao Windparken II y e turbinanan nobo ta wordo entrega pa Vestas Benelux. Segun Kolader ta sigui declara na AD, cu e expansion di e parke di molina, Corsou ta avansa enormemente den energia berde. No solamente e intencion ta pa surpasa Aruba, pero mas impresionante ta e hecho cu despues di Dinamarca, Corsou lo ta e number 2 di mundo riba energia duradero no convencional. E intencion di Corsou ta pa saca 50% di energia di fuentenan duradero. Cu e plannan pa energia solar den e proximo 2 añanan, nan lo logra nan meta cu 10 aña prome cu e fecha di 2030. 

SITUACION ARUBA

Mientrastanto na Aruba ainda e proyecto di expansion di parke molina ta pega den corte y no tin fin di haya un 'solucion'. E problema ta e hecho cu tin gruponan bringando e localidad di e di dos parke (na Urirama). Despues cu gobierno a otorga e hindervergunning, mester a cambia esaki pasobra a cambia di tipo di turbina. Mirando cu no por a simplemente cambia esaki, mester a cuminsa cu e proceso di nobo pa haya e permiso necesario. Den cuadro di esaki un biaha mas a inicia casonan den corte, y cu a crea e tardansa necesario. Te cu awor, no tin un claridad riba e asunto ni si e parke por bin y si e bin, na unda. 

MESUN DOÑO

Mester nota cu e mesun personanan cu ta encarga cu esun na Aruba ta esnan cu a firma pa e di dos parke na Corsou, esta Henk Hutting di NuCapital. E ta e persona cu a firma pa e compania diabierna siman pasa na Corsou. Pues mientras cu na Aruba ta bringando e tema y proyecto den corte, Corsou ta sigui move cu nan expansion. Contrario na Aruba, Hutting no a confronta problema cu e tereno unda cu lo ubica e di dos parke. Foto cortesia www.abt.eu.  Fuente di informacion Antiliaans Dagblad