Burocracia di gobierno a causa tardansa di pago na Bouldin & Lawson

ORANJESTAD - Gobierno a su sistema burocratico a pone cu ainda no por a paga e ultimo suma na Bouldin & Lawson,(B&L) cu a conduci na un suma extra awor cu nan tin cu paga proximamente segun un sentencia di hues. Minister di infrastructura Benny Sevinger a confirma na NoticiaCla.com cu e tardansa di e proceso a pone cu e compania B&L a hiba gobierno corte pa forsa pago. E pago lo wordo haci, pero ta lamenta cu e caso a bay di e forma cu el a bay. E mandatario no por a confirma si ki dia e pago awor lo tuma lugar. 

NO TABATA RESPONSABEL PA PAGO ANTERIOR

E mandatario a bay bek na e momento cu el a sinta na 2009 como minister di infrastructura, y a hay'e presenta cu un recibo di mas of menos 3 miyon florin di B&L. Pero mirando cu el a caba di sinta, no a considera e asunto su responsabilidad sino di e minister y gobierno anterior y como tal a opta pa no paga esaki. Despues el a hay'e ta paga toch, ora cu a bay haci investigacion kico tur e tabata. E aña aki finalmente e ultimo parti a keda presenta y completa, cu a nifica tambe cu gobierno mester a paga e compania. 

FUTURO DI E PROYECTO DI FLUFF

Mientrastanto riba e futuro di e proyecto, Sevinger no tabatin un contesta fiho, sino mas bien a bisa cu lo purba wak kico di e proyecto por wordo uza ainda y sino, lo uza e material como scrapmetal. Esaki pasobra e proyecto cu gobierno anterior a inicia y cu awor ta cla, no ta e forma pa proceder, aunke cu e machinan ta cla. E mandatario no ta kere den e operacion ey y p'esey no ta bay laga e operacion ey continua. Mas bien ta trahando pa un alternativa cu si ta conta cu sosten di e mandatario, y lo wak te na unda e operacion cu a wordo laga cla (y awor full paga), lo por fit aden.