Gobierno ta admiti fayo cu tereno na Bubali Plas

ORANJESTAD - Un gobierno no por mara un otro gobierno y pais Aruba cu un Ruimtelijk Ontwikkelings Plan (ROP) y como tal awor gobierno ta den proceso pa cambia esaki. Esaki ta pasobra un ROP ta un plan di maneho y no un ley. Y e no por stroba un gobierno nobo di funciona. Minister di infrastructura Benny Sevinger a admiti na NoticiaCla.com cu nan a comete 'mea culpa', ora cu a duna (algun) compania un opcion riba tereno erfpacht den un area cu segun e ROP actual, ainda ta berde. Ela admiti cu esey no mester a sosode. Como tal ta bezig ta corigiendo esaki cu cambio di e ROP, y despues esnan perhudica por haya nan terenonan manera palabra. 

GOBIERNO CAMBIANDO R.O.P.

E mandatario ta referi na e terenonan den disputa den corte cu ta trata e area den y rond di Bubali Plas cu segun e ROP ta parti di e  maneho berde di pais Aruba. E ROP a wordo estableci pa e gobierno anterior y ta valido te 2019. Pero mirando cu gobierno actual tin otro pensamento riba e asunto aki, nan a bay di acuerdo y duna opcion di erfpacht di algun percela cu ta den e area aki y cu ta cay den e ROP. Pa coregi e situacion, ta den proceso pa adapta e ROP, pero esaki a tarda hopi y como tal ainda no ta cla. Den corte recientemente abogado di gobierno, Johan SjiemFat a priminti cu gobierno lo keda cla den e proximo lunanan. P'esey a pidi e compania cu recientemente a hiba gobierno corte, pa tene poco mas pasenshi pa duna gobierno chens pa cambia e ROP. Ta premira cu posiblemente prome cu e fin di e aña aki ainda esey por sosode. 

GOBIERNO A CREA E VEGETACION NA BUBALI PLAS

Sevinger a splica NoticiaCla.com cu e motibo di e cambio di ROP ta pasobra e tereno cu ta den disputa, no ta berde aunke cu gobierno anterior a marke asina den e ROP actual. Segun Sevinger, si no ta pa e proyecto di DOW (Planta di purificacion y di tratamento di awa di rioolwater di Oranjestad pa Bubali Plas) na e sitio cu a crea un ambiente nobo di naturalesa cu a desaroya den un tipo di area berde, pero traha pa hende. "Esaki a trece vegetacion. Vegetacion a trece pisca. Pisca a trece pahra, y esey a bira un area berde cu nos tur ta contento di dje" e mandatario a bisa. Sin e proyecto di DOW (nan ta manda 5.000 m3), e area lo no a bira asina y awe no tin e problema cu tin aworaki. E mandatario ta considera e area uno mas bien fertil pa desaroyo economico, mirando su ubicacion den e tourist corridor. "Esey no ta kita cu bo tin cu para otro desaroyonan pasobra esey (e situacion di Bubali Plas) ta tumando lugar" Sevinger a bisa. Ademas, segun e mandatario, 60% di Aruba ta marca como area berde caba, y esey ta suficiente. No obstante esey ora cu caba redestina e ROP, lo tin cierto areanan na Bubali cu lo keda como tereno berde. Ora cu keda cla cu tur cos, e companianan cu ta den disputa cu gobierno pues, lo bin na remarke atrobe pa e terenonan.