Acuerdo firma entre Aruba Ports Authority y Havenbedrijf Amsterdam

ORANJESTAD - Aruba Ports Authority y Port Amsterdam International awe a firma un acuerdo di cooperacion di varios aña. Meta di e acuerdo aki ta pa realisa un cooperacion intensivo y duradero cu e enfoke pa ehecuta e vision comercial y strategico di APA, e transformacion di e terenonan portuario na Oranjestad den un area multifuncional y fortalece e ambicion internacional di ambos compania.

POAI LO FORTALECE STAD DI APA

E acuerdo aki ta efecto di un investigacion cu PoAI a haci pa explora e strategia comercial, posibilidadnan di crecemento y strategia comercial pa APA logra cu efectividad su metanan. Como parti di e acuerdo PoAI lo establece den futuro un Chief Commercial Officer (CCO) na Aruba pa fortalece e staf di APA. E CCO lo wordo apoya pa un team multidiciplinario na Amsterdam. 

MOU ANTERIOR FIRMA

Aruba Ports Authority ta un compania di Gobierno di Aruba y ta responsabel pa maneho, desaroyo y explotacion di e wafnan di Aruba. Den luna di maart 2015 APA a firma un MoU cu Port Amsterdam international B.V. (PoAI). PoAI ta un subsidiario di Havenbedrijf Amsterdam N.V. y e ta specialisa den investigacion, desaroyo y maneho di wafnan crucero internacional. 

GERT-JAN NIEUWENHUIZEN

Gert-Jan Nieuwenhuizen, Managing Director di PoAI: “E acuerdo di cooperacion lo percura pa nos companianan portuario fortalece nan mes conhuntamente riba diferente parti y ta cuadra exactamente cu e strategia internacional di Havenbedrijf Amsterdam. Nos ta mira padilanti na un continuidad di un relacion di cooperacion placentero cu APA y gobierno di Aruba.” Mientrastanto Sr. Louis Posner Presidente di e Hunta di comisario di APA a declara: ”Durante e trayecto inicial a keda demostra cu PoAI y APA ta riba e mesun liña pa loke ta nan vision pa Aruba y esaki ta desemboca den un acuerdo di cooperacion. E acuerdo aki ta un bunita ehempel con Aruba y Hulanda hunto por apoya otro y fortalece nan relacion.”

PORT OF PARTNERSHIPS

E meta pa transforma e terenonan di waf ta pa duna nan un funcion nobo y pa habri nan pa comunidad Arubano. Ciudad, recreacion, turismo y comunidad comercial tur lo por estrecha nan relacion na un manera duradero di e forma aki. Pues APA lo haci uzo di e experiencia di Havenbedrijf Amsterdam cu tipo di proyectonan asina via PoAI pa implementa e transformacion na Aruba. Ademas Aruba ta representa un Hub ideal pa Havenbedrijf Amsterdam mantene su contactonan cu partnernan importante den Latino America. E acuerdo di cooperacion tambe ta acopla na e pensamento “Port of Partnerships” di e compania pa traha duro y hunto pa logra relacionnan inspirativo y intensivo di cooperacion cu partnernan complementario. Aruba por mira padilanti na un futuro di posibilidanan nobo cu ta habri cu e acuerdo di cooperacion aki cu Havenbedrijf Amsterdam y su subsidiario Port of Amsterdam International.