Croes: Alerta pa uzo ilegal di nomber di CITGO Aruba pa trabou

ORANJESTAD - "Nos kier keda alerta nos comunidad riba practica ilegal y tambe uzo di nomber di e refineria di Aruba pa probecho politico personal". Asina e mandatario di labor Paul Croes a relata den fin di siman. NoticiaCla.com a compronde cu un email ,- cu a yega tambe pa NoticiaCla.com-, den weekend cu e domain 'citgoaruba.com' mas probabel ta uno 'ilegal'. E mandatario no ta haci mencion specifico di e mail aki, pero ta keda mas 'general'. Mientrastanto e website www.citgoaruba.com a wordo baha y no ta activo diripiente. Esnan doño di e domain, (e nomber registra) a sigura cu nan ta legal y cu nan ta haciendo tur cos segun regla. 

GOBIERNO TA MONITOR TUR COS

Segun e comunicado di gobierno, e ta bisa cu nan ta monitor y ta laga Inspeccion di Labor haci su control riba negoshinan cu ta wordo haci den nomber di CITGO sin tin autorisacion pa haci esaki. "E ta contra ley di propiedad intelectual di companianan estableci na Aruba", Croes a bisa. E reaccion di e mandatario di Labor a bin como reaccion riba e anuncio di companianan y of oficinanan cu supuestamente tin acuerdo cu CITGO pa duna hendenan trabou den refineria. 

PRETENDE OF ACTUAL ILLEGAL TA CASTIGABEL

Pretende of actua di forma ilegal of sin autorisacion den nomber di un persona of entidad ta un hecho castigabel segun nos codigo penal. Tambe Minister di Energia Sr. Mike de Meza e condena e hecho cu cierto personanan kier haci mal uzo di algo positivo, pa nan propio beneficio.

REACCION RICHARD ARENDS

E hefe di e ekipo di negociacion di Aruba, Sr. Richard Arends a comunica tambe cu e ehecutivonan di CITGO kendenan tambe a mustra nan preocupacion y a desaproba e practicanan iregular den nan nomber. CITGO ta desaproba cualkier uzo no regula di nan nomber. Esaki ta enpugna cu nan derecho di propiedad intelectual. Tambe ta cobra personanan un ‘fee’ pa inscribi pa haya trabou den e refineria. Minister Paul Croes ta mustra categoricamente cu ta un instancia oficial di Gobierno tin cu ta e CITGO Desk y cu no tin ningun gasto pa mara na dje. "Mi kier alerta nos comunidad pa no cay den trampa di e hendenan aki", Minister Croes a mustra.

GARANTIA DI CITGO

Segun gobierno di Aruba, CITGO Desk ta garantisa e privacidad di esnan cu aplica como cu ta trata di funcionarionan publico cu ta huramenta y cu ta trahando na departamentonan di Gobierno. "Otronan por bisa cu nan ta yuda bo haya trabou, pero cada ciudadano lo mester pidi e supuesto oficinanan aki pa mustra nan contratonan cu nan tin sea cu CITGO of cu contratistanan. No cay den trampa di e hendenan aki", Minister Paul Croes a mustra.  E email oficial di e CITGO Desk ta Cginfodesk@arubagovernment.aw. 

Ningun otro ta traha den nomber di CITGO of di Gobierno di Aruba. Gobierno lo continua monitor cualkier moveccion iregular di personanan of companianan cu kier saca probecho di hendenan inocente cu e falso promesa di duna nan trabou den refineria.