ATA: Expansion buelo extra KLM pa Aruba resultando positivo

ORANJESTAD– E compania Hulandes di aviacion KLM a introduci vuelonan extra pa Aruba durante e zomer aki. Segun ATA, esaki a bin ta duna resultadonan hopi positivo, y debi na e exito aki a dicidi di ya aloca mas capacidad aereo pa Aruba pa e temporada di invierno 2016/2017. 

FRECUENCIA DI BUELO

Pa 2016 KLM tawatin originalmente un total di 61.105 asiento programa, comparti entre Aruba y Boneiro di cual rond di 60% (36,663 asiento) ta wordo uza pa esnan cu ta pasa nan estadia na Aruba, versus otronan cu ta baha na Boneiro. E aumento aki ta iguala rond di 3.800 asiento adicional pa Aruba for di e luna di november pa maart. KLM a dicidi di mantene e di 6 frecuencia –riba diadomingo- cu a introduci durante e temporada di verano aki, pa invierno 2016/2017.

MERCADO POTENCIAL EUROPEO

Segun ATA, e mercado Europeo tin potencial fuerte pa crece restante di e aña aki y durante aña 2017. Actualmente mercadonan principal di Europa pa Aruba ta Hulanda/Reinonan Uni/Alemania/Italia y Scandinavia. Esfuersonan di mercadeo di parti di KLM como tambe diferente acontecimiento importante di turismo na Europa ta mustra e importancia di aumenta e capacidad di asiento pa nos destinacion. Pa e prome 5 lunanan di 2016, Aruba a ricibi un total di 30.337 bishitantenan for di Europa, cu ta 6.2% di e total di turismo pa nos isla. Europa a crece cu 5.1% den e prome 5 lunanan pa loke ta bishitantenan ‘stay-over’ pa nos isla.

AVIONAN MAS GRANDI

KLM lo bula cu avionnan mas grandi esta e airbus A330-300. E vuelonan extra ta sali mas laat cu normal, cual lo percura pa un miho conexion cu e otro mercadonan manera Bremen y Hannover (Alemania), Bergen (Noruega), y Glasgow y Birmingham (Reinonan Uni), cual tur ta biahe via Hulanda pa nos destinacion.