Polis trahando pa 'ruim op' mas tanto 'autowrak' posibel

ORANJESTAD - Polis trahando pa 'ruim op' mas tanto 'autowrak' posibel. Esaki cuerpo di polis a anuncia pa medio di un comunicado e weekend aki. Aruba tin un problema serio cu autowrak, unda cu tin sitionan cu a bira conoci pa e fenomeno aki. Na Bushiri tin un sitio asina cu recientemente a keda raporta ariba. Awor un grupo di polis como parti di nan 'pasantia' a tuma e proyecto aki pa elimina e autowrakken aki. 

GUIA DI SCOL PA POLIS 

Bou guia di Scol pa Polis, un grupo di Agent Eerste Klasse durante di nan stage di shete siman ta trahando duro pa ruim op mas tanto “autowrak” posibel. Un “autowrak” ta un auto bieu y/of kibra cu ta para pa algun tempo. E doñonan mes hopi biaha no sa kico pa haci cu nan, pero entretanto e structura ta forma problemanan pa medio ambiente y frecuentemente ta afecta e ambiente di biba den e vecindario.E team trahando riba e proyecto aki ta consisti di Javier Gonzalez, Joshua Kelkboom, Kendrick Werleman y Chari Maduro. E lider di e grupo ta Elvis Perez.

RECICLA AUTO

E agentenan a logra haya Papito Towing pa asisti nan cu e transportacion di e autonan. E autonan ta wordo hiba pa Daltra, cual ta e unico compania cu tin actividadnan pa recicla auto na Aruba. Tur e servicionan aki ta gratis pa e ciudadano, danki na e coordinacion di parti di Cuerpo Policial y colaboracion di parti di e companianan envolvi.

AREA FULL ROND DI ARUBA

E team di Polisnan hoben a dicidi cu nan proyecto pa no concentra riba un area so, pero pa tuma ful Aruba como nan teritorio, como cu autonan bieu y/of kibra para banda di caminda of riba un tereno por bira criadero pa sangura y otro insecto y bestianan no desea, cu por transmiti malesa y/of causa hopi molester. E ta un situacion malo tanto pa medio ambiente y naturalesa, como pa e ser humano.

Nan meta ta pa conscientisa comunidad cu tin alternativanan pa deshaci di “autowrakken” y promove miho salud y miho ambiente den barionan rond Aruba.