Companianan sorprendi cu cambio di proceso pa firma carchi AO

ORANJESTAD – E noticia cu docternan di cas na Aruba no por firma carta di AO mas for di comienso di augustus, a bin como un sorpresa pa hopi empresa. No obstante esey, den e prome siman cu e regla aki a bin na vigor, companianan cu awor si ta duna e servicio ey, a conoce un aumento drastico den cantidad di cliente na Aruba. E regla ‘nobo’ ta vigente for di 1 di augustus, y ta solamente aplicabel pa docternan di cas cu ta miembro di Huis Artsen Vereniging van Aruba.

E aumento di cliente pa e negoshinan cu si por duna e servicio, manera aki Medwork, tabata considerabel. Segun un di e directornan, Ru Croes cu a papia cu NoticiaCla.com , nan a conoce un aumento di entre 15 pa 20 compania cu a acerca nan pa e servicio. Y for di nan un gran cantidad a bay cu e servicio. Den cifra di cliente e ta traduci na mas of menos 1000 cliente extra pa luna cu e compania a haya acerca.

Segun Croes, nan a anticipa un crecemento asina cu ta pone cu nan ta prepara pa e fluho extra aki. Docternan nobo a wordo recluta, di cual algun ta docternan empresarial (arbo arts) y algun ta docternan registra cu por duna servicio completo. Ta trata di docternan di e.o. Costa Rica, cu no ta BIG registra, pero cu supervision di docternan cu si ta goza di e criteria ey.

E problema ta cu companianan no a kere cu enberdad docternan di cas lo a bay nenga pa traha carta di AO. Por lo menos segun Croes. “Nan a kere cu cos lo a bay otro”, pero berdad cu docternan a mantene nan mes na e regla. Esey a pone cu e companianan mester a haci nan cambio. Algun di nan no tabata prepara pa e cambio, pero otronan si.