Kooyman: FTA awor kier aumenta lumpsum pa su miembronan

ORANJESTAD – Sindicato FTA diripiente kier un suma mas hopi como lumpsum pa su miembronan trahadonan na Kooyman. Esey a pone cu ainda e compania no por yega na un acuerdo cu e sindicato pa firma e CAO. Asina e compania ta avisa pa medio di un comunicado. Segun e hefe Juri Kooyman, negociacion di CAO di Kooyman y sindicato FTA a continua. 

NEGOCIACIONNAN TA CONTINUA 

Segun Koolman, despues cu diaranson 22 di juni, e firma oficial di un CAO nobo pa un periodo di 3 aña a wordo cancela, Kooyman y sindicato FTA a continua awemerdia cu negociacion. Un punto di diferencia di criterio ta e suma di lumpsum pa cada trahador. Despues cu diabierna, 17 di juni na ultimo momento a acorda cu e suma ta subi di AWG. 750,- pa AWG. 1500,-, sindicato FTA ta exihi awor un suma di AWG 1625,-. 

INSINUACION DI FTA RIBA NO WORK NO PAY

Ademas segun Kooyman, sindicato FTA ta insinua cu Kooyman a prometi di paga orarionan di welga. Esaki no ta cuadra cu berdad, mirando cu Kooyman ta maneha cu e principio di ‘no work no pay’. Kooyman ta mantene su mes na acuerdonan haci anteriormente. ‘Nos ta di opinion cu ambos partido a logra yega na un acuerdo di principio riba diabierna 17 di juni. Nos ta wordo lastimamente confronta cada bes cu condicionnan nobo. Nos ta hopi motiva pa yega na un acuerdo y a haci lo maximo yega na otro, pero nos a yega awor nos 'limite’, segun  Juri Kooyman, Sr. Manager Operations di Kooyman. 

CONDICIONAN LABORAL SECUNDARIO

Kooyman ta desea di enfatisa un biaha mas cu como dunador di trabou semper a pone enfasis riba condicionan laboral secundario pa personal. Esaki ta encera un aumento salarial anual di un averahe di 2.5% a base di evaluacion anual di prestacion di personal. Conhuntamente cu condicionnan manera: regla di pensioen, averahe di 20 dianan di vacacion, vakantietoelage anual y 13de maand como bonus salarial den luna di december. Ademas Kooyman ta inverti enormemente den training di su personal. ‘Den nos sector nos ta tribi di vocifera cu nos ta pertenece na un di e mihor companianan encuanto pago salarial pa luna’. Mi ta confia cu sindicato FTA ta conciente di esaki y ta mantene su mes na acuerdonan di principo acorda pa asina nos por bay ainda na un acuerdo firma oficial di un CAO nobo pa un periodo di 3 aña, Juri Kooyman ta termina. NoticiaCla.com no a logra haya e reaccion ainda di banda di sindicato.