Dialuna Parlamento ta trata CITGO deal den bijeenkomst

ORANJESTAD - Dialuna mainta Parlamento ta trata e CITGO deal den un asina yama 'bijeenkomst'. Presidente di Parlamento Marisol Lopez Tromp a confirma pa NoticiaCla.com cu e reunion a wordo yama pa trata e deal aki, prome cu e bay den un reunion publico. Mientrastanto Richard Arends awe mainta a sigura NoticiaCla.com cu gobierno ta kedando cla cu Valero. Esey tabata un di e 'condicionan' cu gobierno a bisa cu mester keda cla prome cu nan bay Parlamento. Segun Lopez, a pidi ministernan respectivo pa entrega tur documentonan mas tarda diabierna (awe) pa parlamentarionan por a prepara nan mes debidamente. E bijeenkomst su structura sinembargo no ta pa tene un debate sino mas bien informa parlamento di e deal. 

MINISTERNAN INVITA

E ministernan invita ta Mike Eman, Mike de Meza y Paul Croes respectivamente. Nan ta e ministernan cu tabata encarga cu e deal di CITGO y como tal nan mester bin duna cuenta na Parlamento riba e asunto aki. 

DEAL VALERO 

Manera e portal aki a raporta caba anteriormente, gobierno a mustra siman pasa cu 'ora cu gobierno caba negosha cu Valero, nan lo ta cla pa bin Parlamento y presenta e pakete completo di e deal cu CITGO'. Tabata palabra di minister di energia Mike de Meza na presidente di Parlamento Marisol Lopez Tromp diaranson ultimo pa medio. Den e carta ta papia di 'termino hopi corto' pero no a duna fecha exacto. E parti cu segun de Meza, falta pa keda cla ta e e asina yama 'schikkingsovereenkomst'. Como tal de Meza kier presenta e pakete 'completo'. Pa evita posibel problema di confidencialidad, lo sinembargo pone e documentonan solamente disponibel pa 'wak' algun dia na Parlamento, den forma di 'inzage'. 

REACCION DI LOPEZ

Lopez riba su pagina di facebook un siman pasa ainda, a splica e situacion actual na Parlamento. "Siman pasa mi a pidi Gobierno pa entrega e acuerdo(nan) cu nan a anuncia y a sera y firma pa loke ta reapertura di refineria, pa asina Parlamentarionan por prepara nan mes debidamente pa un reunion publico informativo cu 3 minister" Lopez ta cuminsa skirbi. "Pasobra cu Gobierno di Aruba no tin nada firma ainda cu Valero y ta bisa cu ainda nan ta den negociacion, Gobierno ta contesta Parlamento cu e ta prefera warda cu dunamento di e pakete total di informacion 'ter inzage' pa algun dia na Staten, te despues cu Gobierno cera un acuerdo cu Valero" Lopez ta finalisa bisando. 

NO POR COPIA DOCUMENTONAN

Loke ta hala atencion ta cu no kier parti e documentonan rond manera ta haci normalmente, pa evita cu e documentonan por wordo fisicamente copia y reproduci pa medio di foto, pa despues wordo reparti. "Esey lo viola e acuerdonan di confidencialidad entre gobierno, CITGO y Valero y lo por afecta e interes di e companianan aki seriamente" de Meza ta sigui bisa. Como tal lo presenta nan 'ter inzage' pa algun dia na Parlamento.