Love Festival Aruba cla pa su di tres edicion fin di juli

ORANJESTAD – Love Festival Aruba a anuncia su di tres edicion, cu e intencion di bira un dia e festival di mas grandi na Aruba dianan 29, 30 y 31 di juli proximo. E organisador Omar-Steve Lejuez a sigura cu e ta mas cu un concierto di house y trans music, ya cu e ta encera henter un festival di actividad reparti riba varios dia. "Love Festival no ta un concierto of serie di concierto; e ta e experiencia autentico di festival cu ademas di musica ta trece hopi otro atraccion y entretenimento hunto" Lejuez a sigui bisa. 

PARTICIPACION DI ATA

Pa loke ta promocion, Aruba Tourism Authority (ATA) e biaha ta forma parti di dje, y ta boga pa por lo menos haya 500 turista bishita nos isla pa e festival aki. E ta bay di acuerdo cu e participacion (financiero y organisatorio) di e evento, segun su representante Mark Benson Denz, dianan 29, 30 y 31 di juli proximo na Eagle Beach. Mirando e atencion ricibi di medionan local di comunicacion, no tin duda cu e evento aki ta bay ta uno cu un biaha mas lo surpasa expectativa.

DJ'S

Mas di 50 DJ presentando riba 3 stage durante tres dia ta haci di Love Festival unico den su estilo. Hustamente esey ta loke a convence Aruba Tourism Authority pa brinda su cooperacion completo na e evento. Mark Benson di Events & Sponsorship Specialist, a duna di conoce cu net despues di e prome edicion na 2014 a cuminsa papia y awo ta asina leu cu ta apoya e promocion pa medio di su recursonan di mercadeo na diferente mercado clave manera Colombia, Hulanda y Merca. ATA ta di opinion cu e concepto di e festival ta ideal pa turista hoben ehecutivo cu un poder considerabel di compra.

PARTICIPANTENAN

Entre e detayenan treci dilanti durante e conferencia di prensa ta e diferente media internacional cu ya a confirma nan cobertura di e evento aki. Entre nan por menciona RCN, Billboard Magazine, Wall Street Journal y tambe Playboy Magazine. Lejuez a duna di conoce cu ta bay uza cups, tayo, napkins y otro acesorio pa cuminda cu ta traha cu material biodegradabel, algo cu ta sosode pa prome biaha na Aruba y ta contribui na e proteccion di nos medio ambiente.  Pa loke ta benta di entrada, lista detaya di tur DJ y hopi otro informacion mas, por bishita www.lovefestivalaruba.com of e pagina di FB Love Festival Aruba.