BMI: Reapertura refineria lo no genera loke gobierno ta spera

ORANJESTAD - E reapertura di refineria cu CITGO, lo no boost e crecemento economico te na e punto cu gobierno di Aruba ta premira. Esaki debi na e situacion financiero dificil cu Petroleos de Venezuela (PDVSA) ta experenciando. Asina Business Monitor Internacional ta raporta di Aruba den nan 'Aruba Country Risk Report 2016' publica un siman pasa den digitaljournal.com, y cu NoticiaCla.com a pone su man ariba. PDVSA ta e compania madre di CITGO Petroleum cu recientemente via nan subsidiario CITGO Aruba a firma un acuerdo cu gobierno di Aruba pa reapertura di e refineria. Esey ta e unico punto 'negativo' di e rapport, pero importante mirando cu gobierno ta poniendo hopi enfasis cu esaki lo bay saca nos isla di su problemanan financiero. 

INFLACION

Inflacion lo subi den un periodo di 10 aña, maneha primordialmente pa un recuperacion gradual den demanda domestico. No obstante esey, cu Banco Central manteniendo su curso di e florin na dollar, e ta wanta e presion di inflacion importa abou, cu ta pone cu aumento di prijs lo keda suave. Ademas, e deficit financiero lo baha den e proximo 10 aña mientras cu gobierno ta implementa medida pa corta gasto y promove entrada extra. Un politica fiscal mas prudente lo reduci e deficit fiscal mas y baha e peso di e debe di gobierno den un forma modera. 

BALANSA

Aruba su saldo di cuenta coriente lo keda den un surplus den e proximo 10 añanan, danki na entrada robusto den sector turistico y e exportacion di petrolio refina. Esaki lo percura pa Aruba su debe externo lo ta sostenibel pa e proximo decada, segun e rapport ta sigui bisa.