Presidente Bouterse blokeando huicio 'decembermoorden'

PARAMARIBO - Presidente Surinameño Desi Bouterse ta blokeando e reanudacion di e proceso di e 'mortonan di december' cu un apelacion riba e 'seguridad di estado'. E proceso mester a continua awe diahuebs. Bouterse ta wordo culpa di ta responsabel pa e mortonan aki, y ta algo cu e ta desmenti. Pa por blokea e proceso, e ta aplicando articulo 148 di e constitucion. Asina minister di husticia y polis Jennifer van Dijk-Silos a bisa diaranson.  

ARTICULO 148

Articulo 148 ta duna gobierno e posibilidad pa para persecusion legal den casonan concreto si seguridad nacional di e pais ta na peliger. Bouterse a informa parlamento esey tras di porta cera diaranson. Prome, el a informa conseho di minister di e 'solucion' cu el a haya pa e 'crisis constitucional'. E crisis segun Bouterse, a origina ora cu e 'conseho di guera' a dicidi algun siman pasa pa continua cu e proceso di e 'mortonan di 8 di december', despues cu esaki a para keto pa 4 aña. Bouterse, manera informa caba, ta e sospechoso principal den e caso aki. 

Problema cu e uzo di e articulo aki ta, cu Bouterse no por a convence ningun hende pakico e seguridad di estado lo ta na peliger pa motibo di e caso aki. E hunta kier persigui Bouterse pa asesinato riba 15 persona di e regimen militar cu el a guia den añanan 80. Pero atrobe, Bouterse ta desmenti cu e ta responsabel pa e matansa na Fort Zeelandia di e tempo ey. Foto ANP.