Nacionan Uni: Hulanda y Italia por comparti asiento

NEW YORK - Nacionan Uni a bay di acuerdo cu e proposicion di diamars, pa laga dos pais  comparti un asiento no permanente di e conseho di seguridad di Nacionan Uni. Den e caso aki ta trata di e paisnan Italia y Hulanda cu a manda e proposicion diamars pa Nacionan Uni mes y wak si ta acepta esaki. Y e paisnan responsabel pa e parti aki a bay di acuerdo di forma unanime. Cu esey Italia ta tuma posicion di e asiento for di 1 di januari 2017 pa un aña, pa despues Hulanda tuma esaki over. 

E DEAL DI DIAMARS

Tabata diamars cu NoticiaCla.com a raporta cu Nacionan Uni mester a dicidi diaranson si ta acepta e proposicion di Hulanda y Italia pa comparti e asiento no permanente den e conseho di seguridad di Nacionan Uni. Esaki despues cu diamars e votamento no a resulta den un ganador. E ora (manera cu NoticiaCla.com a raporta tambe) Hulanda y Italia a bay di acuerdo pa comparti e asiento unda cu cada un pais ta tuma e asiento un aña (e asiento ta valido pa 2 aña). E proposicion ey a wordo entrega diamars na Nacionan Uni cu tin cu dicidi riba esey mas tarda diaranson. Si acepta e proposicion, Hulanda ta haya e asiento na 2018 pa un aña, y Italia for di 1 di januari 2017 pa e periodo di 1 aña. 

E VOTAMENTO DIAMARS 

Diamars e 193 miembronan di e asamblea di Nacionan Uni a eligi Suecia, Bolivia, Ethiopia y Kazakhstan pa forma parti di e conseho pa periodo di 2 aña. Hulanda y Italia a bringa pa e posicion final, pero no a logra suficiente voto. E paisnan a sugeri pa comparti esaki.