AHATA: Fin di siman ta dicidi futuro di Radisson Hotel

ORANJESTAD – Contrario na informacion recien cu e doñonan di Radisson Hotel Aruba kier solamente bende e edificio, tin informacion cu e doñonan lo por ta interesa den bende e edificio y tur cos cu tin di haber cu e hotel. CEO di AHATA, James Hepple ta informa NoticiaCla.com cu fin di e siman aki e doñonan di Radisson Hotel, Carlson Rezidor Hotel Group, ta dicidi kico ta pasa cu e hotel na Aruba. E deadline pa inversionistanan interesa di cumpra e edificio, registra pa esaki a vence dialuna 11 di augustus. E resultado ,- segun Hepple-, ta 13 inversionista interesa pa cumpra e propiedad. “E bid ta primordialmente pa cumpra e hotel. Pero por resulta tambe cu Carlson Group (e grupo cu ta doño di e hotel) por dicidi cu ningun di e ofertanan ta satisfactorio y cu e prijs of termino di e edifico no ta valido” Hepple a sigui bisa. De hecho, segun Hepple, Carlson Group por dicidi tambe cu nan ta bende tur cos, y cu e doño nobo por dicidi ki tipo di hotel e ta bira e ora.

E realidad ta cu tin un incertidumbre grandi di kico ta bay pasa cu e hotel, e trahadonan y e nomber Radisson, segun Hepple. “Carlson por dicidi cu nan ta keda como donjo tambe y ta keda cu tur cos”. Bisando esey, ta nifica cu e situacion di e trahadonan tambe ta algo cu ta dudoso. Hepple a bisa cu e tambe a tende cu tin retironan na caminda pero no por a bisa cuanto. Tur cos ta depende di kico ta pasa fin di siman aki ora cu e doñonan actual, Carlson Group, dicidi e destino di e hotel.

Pa basta tempo tin incertidumbre riba e futuro di e hotel y su trahadonan. Despues cu tabatin rumor cu e hotel lo a sera y cu e trahadonan lo a haya pakete di retiro, e minister encarga cu turismo, Otmar Oduber a bin dilanti y bisa cu esaki no ta berdad y cu e noticia di benta sinembargo ta real aunke no manera cu e tabata wordo presenta. “E edificio ta na benta y esey ta noticia bieu” Oduber a bisa na tal occasion. Esaki no kier men cu e trahadornan ta perde nan trabou, sino cu e doñonan kier bende solamente e edificio. Cu esaki e la purba pone un paro na e rumornan. Awor ta resulta cu cos por cambia atrobe. Gerente di e hotel no tabata disponibel mesora pa comentario riba e informacion aki.