Arco Iris Kleuterschool ta keda cla na september

ORANJESTAD - Na januari ultimo e contratista Freman, bou supervision di Dienst Openbare Werken (DOW) a cuminsa cu e trabou pa renoba Arco Iris Kleuterschool. E scol tin ocho klas y ta ubica na Oranjestad. Recientemente Minister di Enseñansa Michelle Hooyboer-Winklaar a bishita e scol un biaha mas pa haya un “update” di e progreso di e trabou.

FASE DI CONSTRUCCION

Bouwkundig ingenieur Jaime Winterdaal ta encarga como project manager di parti di Freman, y a splica den ki fase e construccion ta actualmente. E preparacion pa cuminsa traha riba e proyecto a tuma mas of menos tres luna, incluyendo e periodo di destaho publico. E construccion mes a cuminsa riba dia 26 di januari.

SITUACION IMPREVISTO

A haya algun situacion imprevisto durante di e renobacion, pero Freman ta trahando duro pa sigui riba e schedule pa nan keda cla na september proximo, Winterdaal a remarca. El a bisa cu e meta ta keda mescos, pa caba na september pa asina despues di e vakantie di oktober e mudansa ta completo y scol por cuminsa bek na tempo den e edificio renoba.

RENOBACION COMPLETO

E project manager di DOW, esta Eric Vrolijk a agrega cu e scol ta hayando un renobacion completo, for di vloernan pa dak; a baha dak, ta cambiando, drecha e bañonan, y mucho mas. E proyecto ta mas of menos mita caminda, e contratista ta bezig cu e dak y ta yegando e “spanten” mas halto den algun dia.

E ta confirma cu e trabou ta bayendo segun e schema.