Corsou a extradita homber A.B.-V. pa Alemania

WILLEMSTAD - Corsou a extradita diamars e homber A.B.-V. (7 januari 1984, Republica Dominicana) na autoridad hudicial di Alemania. Diamars 28 di juni 2016 e entrega di e homber a tuma luga na aeropuerto Hato door di funcionarionan di Division Crimen Organisa (DGC) na polis di e provincia Nordrein-Westfalen di Alemania. Bou di guia di polis Aleman e la bandona nos pais a bordo di un vuelo di AirBerlin.

Corte Comun di Hustisia a conseha dia 31 di maart 2016 positivo riba e peticion pa extradicion di Alemania. Gobernador di Corsou na su turno a dicidi dia 2 di juni 2016 cu e peticion ta admisibel.

E homber ta ser sospecha na Republica Federal di Alemania di envolvimenento na por lo menos 2 transporte di cocaina dia 16 di juli 2014. E dia ey polis na aeropuerto di Düsseldorf a detene dos mula cu 1.139 gram y 137 gram di cocaina. Nan a identifica A.B.-V. como esun responsabel. E peticion pa extraditacion a keda entrega na Corsou dia 16 di februari 2016 dor di Ministerio di Hustisia di e provincia Nordrein-Westfalen na Düsseldorf. Ya caba dia 11 di juni 2015 tabata tin un orden pa aresto di e homber emití dor di ‘Kantonrechter’ di Düsseldorf.