Ley contra saco di plastic valido for di 1 januari 2017

ORANJESTAD - E ley di saco di plastic a pasa den parlamento den forma unanime. NoticiaCla.com tin confirma cu tur parlamentario  presente a vota pa e ley aki. Esaki ta nifica cu entrante 1 di januari 2017 e ley ta drenta na vigor. Manera cu Noticiacla.com a raporta un dia prome,  e intencion ta pa cu e ley, otro aña ta prohibi pa e.o. supermercadonan y otro negoshi uza saconan di plastic pa hinca comestibel aden. Esnan cu haci esaki toch, por haya un multa di maximo 10.000 florin. Pero un usuario cu wordo haya cu saco asina, no ta haya multa si. Ta asumi cu poco poco e usuarionan mes lo descustuma y cu e cantidad ta baha. 

META DI LEY

E meta segun Rasmijn, ta pa reduci e cantidad di saco di plastic mirando e daño ambiental grandi cu nan ta haci. Mientras cu e uzo ta uno practico den supermercado, despues e saco(nan) ta resulta den naturalesa manera mondi, caminda y mas pio ainda, lama. Segun e parlamentario, gran parti di e saconan aki ta wordo haya na Parkietenbos banda y na e dump, pero tambe riba caya, den mondi, unda cu cabrito y otro bestianan ta purba come nan. Piscanan den lama tambe ta haya problema cu nan. Otro motibo ta pa concientisa e comunidad pa reduci e cantidad general di sushi. 

RETO NOBO 

Cu eliminacion di e saconan di plastic, ta bin un reto nobo, esta den kico ta bay hinca comestibel p.e. aki Rasmijn a mustra cu ta bay enforsa y recomenda saco reusabel, cu ta hopi comun p.e. na Hulanda. Nan ta bin den varios tamaño y ta hopi practico. "E mester bira un custumber cu un persona ora cu e sali for di cas, ta coi su yabi, su bril, su potmoni, su celular y su saco di comestibel" Rasmijn a bisa. Esaki por bira asina chikito cu e por wordo hinca den e saco di carson di e persona. 

NEGOSHI CU TA TRAHA SACO

Esnan cu ta bende y produci e saconan di plastic awor lo haya nan mes cu nan propio reto, ya cu nan negoshi por bira obsoleto. Aki Rasmijn a mustra cu a splica e negoshinan cu ta produci e saconan aki, cu nan por cuminsa pensa awor den produci otro tipo di saconan cu ta reusabel pa asina nan negoshi por sigui funciona. Pero e saconan pa ley, no ta permisibel mas. 

MULTA

E multa maximo ta 10.000 florin, pero esey ta bay den fase. Pues un comerciante ta haya aviso, y finalmente multa. Esnan cu lo tin cu reenforsa esaki lo ta polis, cu mescos cu otro ley, tin cu duna un proces verbaal y ta depende e ora na ministerio publico, cuanto e multanan por bira. Loke cu parlamento ta stipula ta e maximo.