Aruparking ta anuncia iParkMe, e app pa parkeermeters

ORANJESTAD - Dia 8 di juli proximo e app pa parkeermeters 'iParkMe' ta drenta den funcion, ofreciendo asina un facilidad y servicio adicional pa tur usuario di Aruparking. Asina director di Arubus, compania madre di Aruparking a informa diamars mainta. Entrante e fecha aki e pago di parkeermeters por wordo haci via e app, cual por wordo download gratuitamente riba iStore, PlayStore of aruparking.com. 

BENEFICIO Y GASTO

E facilidad di pago aki lo bay ta beneficioso pa mayoria di hende mirando cu sea e persona ta den un reunion, ta come of ta shop e no mester bay te na un parkeermeter pa recarga, e por wordo haci rapidamente via celular.  E download y costo di e prome dos lunanan lo ta gratuito y despues e lo tin un costo di 3 Dollar pa luna durante cual lo por haci uzo di e servicio cuanto biaha cu ta desea. Pa recarga e credito di e app por hacie via credit card, paypal of por pasa na oficina di Aruparking den Wilhelminastraat y e minimo pa recarga lo ta di 10 Dollar. Uzo minimo inicial ta di 2 Florin pa 1:30 ora y despues di e esey lo por recarga pa un minimo di 3 minuut. Marvin Maduro, IT di Aruparking a duna un splicacion un poco mas detaya pa loke ta e uzo di e app. El a bisa cu e app ta hopi simpel pa uza, simplemente mester registra e nummer plaat di e auto na cuminsamento, por park, unpark y recarga. E ultimo aki por wordo haci via paypal, credit card of cash na oficina di Aruparking. E pago di parkeo ta bay den 3 stap: Primi pa paga; Selecta e zona; y Confirma e zona. Un beneficio grandi di e app ta cu e ta duna placa bek. Si por ehempel a paga pa para 5 ora y solamente a uza 3 ora, e usuario ta bay na e opcion di unpark y e resto di placa cu no a wordo uza lo bay bek na e saldo cu tin disponibel.  Tambe e app ta duna notificacion na e usuario ora su tempo paga pa parkeo ta finalizando y ta duna e opcion pa pone mas placa. E idioma di e app ta na Ingles, pero lo parti informacion di e app no solamente na Ingles, pero tambe na Spaño y na Papiamento. Finalizando por bisa cu e placa cu wordo deposita riba e app no lo caduca y lo por wordo uza na cualkier momento.