Pop up-Clean activo na Tanki Leendert den weekend

TANKI LEENDERT  - Pop Up-Clean up a tene su di cinco accion di limpieza 26 di juni 2016. A toca turno na e e mondi patras di di Texaco Tanki Leendert na Paraguana. Como 30 boluntarionan, di cual tambe e habitantenan di Paraguana y boluntarionan di Aqua 48, a presenta pa buta man na obra cu e materialnan cu AHATA y Fundacion Aruba Limpi a sponsor. 

KEN TA HACI E DAÑO

Den un lapso di 3 ora a logra limpia mayoria parti di e mondi y a yena un container di 20 yarda completo cu sushi mane botternan, bleki, saco di plastic y foambox. Locual cada biaha ta ripara ta cu generalmente no ta e hendenan di e bario mes ta contamina e mondinan, pero ta e hendenan cu ta hasi uzo di e caminda na pia of den auto. Nan ta tira entre otro pakinan di cuminda of botternan bashi cu nan a cla di consumi for di nan bentana di auto den e mondi. Cada biaha Pop Up-Clean up ta keda sorprendi cu e mentalidad di hendenan cu ta biba na nos isla unda ta pensa cu ta oke pa tira bo sushi unda cu ta. Por wak cu nan sa cu no mag, mirando cu nan ta hasi esaki scondi. Esaki ta e desafio mas grandi cu Pop Up-Clean up tin; cambia e mentalidad di nos comunidad ora ta trata di tira nan sushi. 

PONE BORCHI

Na unda a hasi limpi a buta 2 borchi cu e texto “Naturalesa pa tur disfruta, mantene limpi”. E meta di e borchinan ta pa motiva hende pa wanta e mondinan limpi. E idea ta tambe pa e hendenan di e barionan mes keda mantene e mondinan y confronta esunan cu ta susha. Habitantenan mester sa cu nan por yama polis of City Inspector ora ripara cu no ta bin cambio den e situacion. 

KEN TA POP UP CLEAN

Pop Up-Clean up ta un iniciativa di hobenan profesional cu a bini huntu pa activa hende pa tene Aruba limpi dor di crea conciencia, responsabilidad y promove dialogo entre habitantenan, comercio y instancianan gubernamental. Pa mas informacion riba e actividadnan di Pop Up-Clean up y e proximo accion di limpieza, por bishita e Facebook page di Pop Up-Clean up.