Aruba presente na apertura ampliacion Canal di Panama

PANAMA CITY - Den fin di siman a tuma luga e acto historico, unda oficialmente a inaugura e ampliacion di e canal di Panama. Cu un retraso di 2 aña y varios biyon na inversion, e proyecto porfin a keda cla. E meta di e gobierno di Panama ta pa desaroya Panama den un hub logistica di Merca. E canal lo sirbi un asina yama ' shortcut ' di 2 pa 3 siman pa barconan di carga yega Latino America y Merca. Den esaki Logistica y Sector Maritimo Hulandes a sigui e desaroyonan aki hopi di cerca.

VISION DI ARUBA Y PANAMA

Expansion di e canal na Panama ta crea un desaroyo economico cu ta cuadra perfectamente cu e vision di Aruba di ta e hub entre Europa y Merca. Den cuadro di esaki mes ta di suma importancia cu nos ta bon representa. Durante e acto oficial diadomingo na Panama Minister di Turismo Otmar Oduber acompaña pa director di departamento di relacionnan Exterior Edwin Abath a representa Aruba. Reino Hulandes a percura pa ta presente unda entre Vicepremier Lodewijk Asscher di Hulanda y tambe Prome Minister di Curaçao, Bernard Whiteman ta presente. 

DESAROYO AMPLIO Y OPORTUNIDAD ECONOMICO

Cu e expansion di e Canal di Panama por spera un amplio desaroyo y oportunidadnan economico den e region di Centroamerica. Reino Hulandes sigur lo no kier niun oportunidad pasa bay sin explora esakinan. Den cuadro di esaki Vicepremier Asscher dialuna mainta lo reuni cu oficialnan di Panama y tur e companianan Hulandes estableci na Panama unda lo hiba un discusion riba entre otro desaroyo den Logistica y e Sector Maritimo di Panama y con companianan Hulandes por probecha di henter e desaroyo aki. 

E CANAL

E canal su construccion a keda termina 15 di augustus 1914 pa Merca, y ta un canal di 48 miya cu ta conecta oceano atlantico cu esun pacifico. Na 1999 despues di un control Mericano comparti cu Panama, Panama a haya control total di e canal. Fotos cortesia Edwin Abath.