Eman: No por cera turistanan den 4 murayanan di hotel

ORANJESTAD - Ora cu papia di Aruba siendo un 'One Happy Island" turistanan no por keda cera den 4 murayanan di e hotel. Pensamento di un prome minister Mike Eman decidido pa manda un señal fuerte pa AHATA diabierna, cu gobierno ta uni riba e asunto di all inclusive. Eman tabata fuerte diabierna ultimo riba e tema all inclusive cu segun e prome mandatario, tin Aruba innecesariamente den su gara. Aki e ta referi na e gremio hotelero AHATA cu ta guia pa hendenan cu tin nan agenda y nan interes y no esun di Aruba na pecho. Mientrastanto colega minister Otmar Oduber a comparti e preocupacion di all inclusive den fin di siman mientras cu AHATA di su banda, via e columista Bati Bleki, un biaha mas a mustra nan respectivo preocupacion di nan angulo. 

SALIDA DI AHATA FOR DI ATA

Siman pasa e tres miembronan di AHATA a sali di e bestuur di ATA, causando un situacion incomodo. Eman ta haya cu Aruba mester ta uni ora ta regarda temanan di interes asina grandi pa Aruba pasobra con cu bay bin nos tur tin cu biba riba e isla aki. Su punto ta cu ora cu papia di Aruba siendo un 'One Happy Island" turistanan no por keda cera den 4 murayanan di e hotel. 

OBSERVACION RIBA ALL INCLUSIVE

"Tin yen di discusion y hendenan kier wak tur estudio haci. Ami a wak un cu ta bisa tur cos. Ta un estudio haci door di World Trade Tourism Organization. Su conseho ta hopi cla y logico. Si bo tin un destinacion turistico cu hopi bes no a wordo desaroya suficiente - no tin restaurant di calidad y criminalidad ta halto , siguridad ta laga di desea - e sistema di all inclusive ta ideal, e ta funciona y e ta yuda baha e desempleo den e pais ey. Pero, si bo destinacion ta enfoca den brinda e maximo experiencia riba turismo den bo pais, bo tin e miho restaurantnan na mundo, bo tin un hospitalidad pa cual Aruba ta wordo reconoci como 'One Happy Island' den henter mundo, anto mas all inclusive absolutamente no ta na su luga." Eman a pone enfasis riba e ponencia cua ta e Happy island cu e turista ta bay experiencia si e wordo cera den hotel. "Cua One Happy Island nos mes lo celebra si nos tene e turista paden pa inversionistanan cu ta doño di edificionan - cu tur respet pa nan inversion y loke nan ta mira como nan interes - kier sigui desaroya e sistema all inclusive."

HUSTO PA SIGUI CU TREND ALL INCLUSIVE?

Eman ta hasta puntra su mes si ta husto pa pidi un pais y den e sentido aki e gobierno, pa sigui riba e trend di bin cu mas all inclusive. "Nos a drenta den gobierno y a mira cu turismo ta e scapatorio pa Aruba den e situacion cu e tabata aden."