Enrique Iglesias a 'steal the show' diasabra na ASMF 2016

ORANJESTAD - Enrique Iglesias a 'steal the show' diasabra anochi durante e di dos anochi di Aruba Summer Music Festival 2016, basa riba e reaccion di e publico. Un publico notablemente mas grandi riba e di dos anochi a confirma cu esey tabata (te cu awor) e anochi mas popular. Kitando afo cu e programa mes a cuminsa 2 ora mas laat cu programa (10'or en bes di 8'or y mei), y cu a bolter e line-up completo, unabes cu e programa a cuminsa a pone tur hende lubida e tardansa, calor y cambio di schedule. Unabes 'on', e artistanan un tras di uno a sa di duna e publico loke nan a bin mira.. goso, musica y placer. Y di nan tres, Enrique Iglesias a domina e publico, sigui pa Gente de Zona y finalmente Tito Nieves cu mester a canta pa un publico mas chikito debi na probablemente e ora laat. Na tur, organisadornan a mustra NoticiaCla.com cu tabatin sigur entre 6 pa 9 mil persona na su momento mas 'hot' diasabra anochi. 

E PROGRAMA Y LINE UP

E prome artista programa pa presenta tabata Tito Nieves, sigui pa Gente de Zona sigui pa Enrique Iglesias. Pero ya a bira conoci cu Iglesias a notifica organisadornan cu e no kier a canta mucho laat, y a pone na di dos lugar. Pero tardansa di e yegada di e musiconan di Tito Nieves a pone cu a surgi un tardansa di dos ora. Ora cu a kere cu ta Nieves lo a cuminsa, Gente de Zona a subi y cuminsa cu su presentacion. Y na final Tito Nieves den careda di 1'or a subi escenario. "Mi a warda 5 ora pa canta. Mi tabat'ey fo'i tempran" Nieves a bisa su publico. "Pero mi no kier a bay sin canta pa hendenan di Aruba" Nieves a bisa cu un sonrisa, y su show a cuminsa. Loke a hala atencion e anochi aki tabata e presencia di cantidad di drones e anochi ey. Dado momento tabatin por lo menos 4 drones bulando pa gara e miho momentonan di e concierto. Y cada artista a atende cu esaki den nan mesun forma. Gente de Zona no tabatin problema alguno y te hasta a duna un show dilanti un di e dronenan cu tabata hopi cerca. Di otro banda, e cantante Enrique Iglesias a exigi cu prome cu e subi, tur drone mester ta abou. "Por fabor tur hende cu tin drone, baha esaki sino Enrique Iglesias no ta subi", e MC DJ 101 a pidi den publico. Esaki ta comprendibel mirando e experiencia malo cu Iglesias a sufri aña pasa durante un concierto na Mexico ora cu el a bay gara un drone, cu a corta su dedenan mal corta. Ora cu tur drone tabata abou, e show di Iglesias por a cuminsa. 

GENTE DE ZONA

Gente de Zona, consistiendo di Alexander Delgado y Randy Malcom Martinez mesora a sa di gara e publico cu nan interaccion yena di energia y sinergia. Un tras di otro e temanan tabata zona den Harbour Arena. Uzando e tema "La Gozadera" como base henter anochi, nan a sa di tene tur hende den gara di nan temanan. Y na final nan a los esun cu Enrique Iglesias 'Baliando". 

ENRIQUE IGLESIAS

Conoci como un 'total entertainer', Iglesias for di prome instante a mustra cu e tabatin un sin fin di energia pa parti. Cu su petchi y t-shirt como 'trademark', Iglesias mesora a uza e scenario di punta pa punta, y manera ta su custumber, no a dura mucho prome cu el a bula den e publico pa deleita nan. Y segun e ritual di Iglesias, el a busca un persona special pa alegra su anochi, sacando un selfie cu ne, sigui pa mas selfies den publico. Y tambe como parti di su ritual musical, aki tambe el a invita un dama riba scenario pa asina e canta hunto cu Enrique. Aunke cu e dama no a canta, el a sa di steal the show si, door di cuminsa dirigi e publico riba tono di Iglesias. Su arte di envolve e publico a pone cu e publico aun a gusta su presentacion mucho mas. Sigur e damanan. Y cu e show elecrificante, el a 'steal the show' sigur e anochi ey, demonstrando cu e tabata e 'highlight principal' di e anochi. 

TITO NIEVES

Poni pa habri e anochi, cos a bolter formal pa Nieves cu mester a warda hopi ora pa subi y na final a hay'e ta presenta pa un publico cu mester a warda hopi pa wak e. Mesora (manera indica caba), Nieves a sigura su publico cu no ta su fayo y cu e tabat'ey for di tempran. Y unabes esey a keda estableci, Nieves cu su orchesta a pone un sonrisa y hunto cu su orchestra, a presenta su exitonan un tras di otro. Esnan cu a keda te final pa Nieves, no a defrauda y a grita, balia y gosa su salsa  y merenguenan te final di e concierto banda di 3'or. Un cabayero completo, Nieves a sa di adapta su mes y presenta su exitonan grandi bieu y nobo, y esey a pone cu tur hende rapidamente a lubida cu nan mester a warda oranan largo pa nan idolo latino.