A cuminsa cu accion grandi contra benta di droga riba caya

RANJESTAD - Un siman y mey pasa Mando Policial a cuminsa cu intensificacion di accionnan contra di benta di droga riba caya. A cuminsa na trece diferente unidad di Cuerpo Policial hunto pa crea un team solido multi disciplinario pa ataca e “straatverkoop” di varios angulo. E accion na Avenida Alo Tromp 35 riba diaranson tabata e prome di un serie di “inval” cu lo tuma luga den e proximo simannan y lunanan, segun Vocero di Cuerpo Policial Lito Lacle ta splica. Na e adres aki a tuma luga aresto di un hende muhe y un hende homber y relaciona cu e investigacion andando Cuerpo Policial no tabata dunando mas detaye di e caso na momento di e arestonan.

Lito Lacle a splica cu e benta di droga na e adres aki ta algo cu tabata tumando luga hopi habri y den un rato di ora por a mira bastante hende ta cumpra droga. E team cu a efectua e accion y asina cuminsa e guera contra benta di droga riba caya cu un planning hopi strak ta consisti miembronan di Arrestatieteam, di e Unit Georganiseerde Criminaliteit y di Straatdienst Oranjestad. Cuerpo Policial ta gradici comunidad pa nan contribucionnan valioso cu e tipnan cu nan ta laga riba e liña di tip di polis 11141. Na e tiplijn aki, miembronan di comunidad por yama y laga tipnan di un forma completamente anonimo, y Cuerpo Policial ta tuma nota di e tip y ta haci su investigacion. Lito Lacle a agrega cu ta importante pa Cuerpo Policial pa ciudadano cu laga un of mas tip comparti mas detaye posibel di e situacion pa cual nan ta pidi atencion di autoridadnan. Cada tip ta un contribucion valioso di miembronan di nos comunidad cu ta na bienestar general di su mesun comunidad, y polis ta analisa tur tip cu seriedad.

El a finalisa bisando cu si ta posibel, si e persona cu yama duna e tip ta desea di comparti mas detaye di e tip cu Cuerpo Policial, e por laga tambe su number di telefon den e grabacion y un miembro di Cuerpo Policial encarga lo yam’e bek pa tuma e informacion. E mensahe ta cla y raspa, Cuerpo Policial ta den un lucha contra e benta di droga riba caya y ta sigui determina pa kibra e cadena di e crimen aki cu ta conduci y contribui na ladronicia y dolor den pa hopi famia. Tur tip nobo ta bonbini, e tipnan ta anonimo na number 11141. Cuerpo Policial ta gradici tur persona cu contribui cu nan trabao y ta contribui na haci di nos comunidad uno mas sigur.