ATA ta lamenta situacion cu a surgi cu retiro di miembronan di AHATA

ORANJESTAD - Aruba Tourism Authority (ATA) ta lamenta supuesto alegacionan no corecto den direccion di ATA cu a surgi den media despues cu tres miembro di AHATA a entrega nan retiro diaranson di e hunta di supervision di ATA. Esey ta un di e puntonan principal cu e hefe di oficina di turismo Ronella Tjin-Asjoe a presenta diahuebs atardi reaccionando riba e retiro abrupto di 3 miembro di AHATA for di e hunta di supervision di ATA. Tjin-Asjoe a confirma e primicia di NoticiaCla.com di un dia prome, splicando cu enberdad un carta a drenta di parti di miembronan di AHATA cu a anuncia nan retiro di e hunta di supervision. Mientras cu AHATA no a duna motibo di e retiro, tin rumornan di alegacionan cu a circula rond den media pa e posibel motibo di e retiro, cu Tjin-Asjoe a haya ta necesario pa coregi. Tjin-Asjoe den un intento pa splica e situacion cu a surgi un dia despues di e retiro abrupto, a mustra cu mes momento tabata necesario pa aclarea algun punto pa evita cu ta 'crea un situacion eroneo' di e operacion di e trahadonan, su persona y otro asuntonan cu no ta cuadra cu realidad. Sigur si AHATA no a presenta motibo alguno pa e retiro abrupto di nan miembronan. 

INFORMACION INCORECTO DI AHATA

Manera e mandatario di turismo Otmar Oduber a trece dilanti algun ora prome splicando pa NoticiaCla.com cu no menos cu algun siman pasa ainda e propio CEO di AHATA Jim Hepple a elogia ATA pa su profesionalismo durante 3 evento tras di otro, Tjin-Asjoe a ripiti e situacion aki diahuebs atardi. "Y awor tin cu tende algun 'sugerencia di e motibonan pa e retiro di 3 miembro'".  Segun Tjin-Asjoe ora cu 'parti di e alegacionan ta trata maneho di ATA' y e seriedad di e topico aki, indicando cu 'kizas tin desconfiansa den e maneho di ATA', y cu tin 'toma di desicion sin aprobacion tambe', mester trata esaki cu tur seriedad. "Mi ta kere cu ta algo hopi serio" Tjin-Asjoe a sigui bisa. Den su defensa,  Tjin-Asjoe a repasa un sin fin di informacion pa substancia e importancia di e departamento y su logranan, usando ehempel di e prestacion sublime di ATA local y internacional y e nomber cu ATA a traha den apenas 5 aña di tempo como sui generis. 

EMBERGADURA DI E CONSTELACION DI HUNTA

Pa splica ademas e importancia y e embergadura di e constelacion di e hunta, e hefe di turismo a splica tambe cu den e forma cu e hunta ta hinca den otro, dificilmente por a sosode cosnan cu AHATA no por tabata sa di dje y of forma parti di dje. Contrario na otro tarea y constelacion di huntanan di supervision, e grupo aki tin un tarea mucho mas estrecho pa supervisa mucho mas cu normalmente mester ta e caso. Esey segun Tjin-Asjoe, ta netamente loke parlamento mes a solicita ora cu a propone e ley di ATA S.G. Loke tambe mester tabata cla, ta cu esnan miembro di e hunta mester a mira e situacion como uno na interes di Aruba en general y no cu e petchi singular di p.e. AHATA., algo cu no ta sosodiendo cu e situacion actual cu e debacle di 'all inclusive'.

AHATA TA CONTRADECI SU MES

Ora cu tin alegacion cu 'maneho no ta di confia segun AHATA', of cu 'desicionan ta wordo tuma sin aprobacion', mester realisa cu ta trata di un aparato, segun Tjin-Asjoe, unda cu cada miembro di hunta di supervision ta basta participe den proceso di aprobacion den ATA tambe, incluyendo propio miembronan di AHATA. Esey ta pone cu tin control mas rigoroso. "Mi no ta kere cu por conclui un biaha mas a base di esey, cu e motibo di AHATA su desicion ta pasobra no tin confiansa den maneho of cu desicionan no ta wordo tuma conforme e liña di aprobacion necesario". Si esey ta e caso, Tjin-Asjoe a mustra, AHATA ta contradeci nan mes y ta kere cu AHATA mester realisa cu nan ta participe di e.o. e proceso di aprobacion di presupuesto y purchasing reportnan anual. Pues si tin algo malo, nan tambe ta sea na altura of culpabel tambe. 

AHATA PLAT 

Mientras cu minister di turismo Otmar Oduber a declara mas prome na NoticiaCla.com cu sin e tres miembronan, ATA ta 'plat', Tjin-Asjoe a splica cu den e forma cu e constelacion ta aworaki (3 miembro di gobierno y 1 presidente) 'e por funciona' ainda pa un periodo pero no mucho largo. Y enberdad, si no yega na un solucion liher, ATA enberdad por ta plat. Pues ta bay spera awor pa wak con por remedia e situacion door di busca 6 miembro nobo di AHATA den cual mester scohe 3 representante nobo. Unabes cu esey ta cla, por continua cu e trabounan regular di ATA. Pa awor trabou por continua cu e 3 miembronan di  gobierno y e presidente. Cuanto mas e situacion por sigui asina sinembargo, Tjin-Asjoe no por a sigura. Hopi no mas. Pues ta na interes di tur hende cu e situacion aki keda resolvi mas liher cu ta posibel, pa beneficio di turismo y pais Aruba.