Total di cinco minister y tres gremio a firma protocol AZV

ORANJESTAD - Un total di 5 minister (De Meza, Croes y Bermudez fisicamente presente y Schwengle y Eman a firma delanta) y 3 gremio comercial (Aruba Time Share Association, San Nicolas Business Association, y Aruba Hotel & Tourism Association) a firma e protocol di AZV dialuna atardi na Edward Cheung Building riba sasaki. Aruba Trade and Industry Association tambe tabata cla pa firma pero su representante tabata den exterior y lo firma e siman aki. Sindicatonan STT y ABV tabata tey pero a opta pa no firma, y KVK a bisa caba cu nan no ta firma. “Tur e otronan a bisa cu nan ta trahando cu nan achterban pa firma y nan por firma despues ainda” vice premier Mike de Meza a sigura NoticiaCla.com.

Pospone e firmamento di e protocol di AZV segun de Meza, no tabata un opcion y lo tabata algo iresponsabel di gobierno, ya cu a warda basta caba. Esaki ta e pensamento di Gobierno, segun vice premier Mike de Meza na NoticiaCla.com, pakico a opta pa firma e presupuesto awo y no, manera cu algun a sugeri, despues cu tende kico e secretariaat di College Financieel Toezicht (CFT) ta bin cune fin di luna. “Ademas, kico ta pasa si aki dos siman of un luna e rapport no keda cla? Nos no por warda mas. Nos lo ta actuando iresponsabel” de Meza a sigui bisa NoticiaCla.com dialuna atardi despues cu a firma e protocol.

Pero mas importante como motibo y diferencia segun de Meza, ta cu e protocol aki ta separa di presupuesto. Pues e uno no tin nada di haber cu e otro. Como tal no ta necesario pa warda CFT keda cla cu su rapport y posibel recomendacionnan. Riba e pregunta di NoticiaCla, cu gobierno ta garantisa cu ki decision of posibel medida bin, a consecuencia di e rapport final di CFT cu e lo no afecta e contenido di e protocol, de Meza a contesta ‘Si, e lo no haci ningun diferencia y tin e garantia ey”.

Un di e sindicatonan di cual su miembronan no a firma, tabata esun di hospital esta ABV. Su presidente Gina Maduro a bisa cu nan a dicidi cu nan ta warda riba e resultado di CFT su rapport y si na final resulta cu e ta ok, anto e ora ainda ABV lo por firma e protocol. Prome cu esey nan no ta firma. Camara di Comercio a avisa for di siman pasa caba pa medio di un email, cu nan no ta participa te ora cu gobierno tuma paso pa baha gasto.

E hecho cu Camara di comercio no ta participa, enberdad ta un punto di precupacion segun minister de Meza a confia na Noticiacla.com, pasobra e ta un representacion grandi di persona, y semper ta bon pa tin un bon ‘base di confiansa’. Pero mes momento de Meza a mustra cu nan a cumpli caba cu varios reduccion di gasto, pues nan no a sinta man cruza y ta haciendo algo. E problema di Camara di Comercio ta cu nan kier mira mas reduccion ainda.

Notable ta e cantidad chikito (3) di gremio cu a participa den e firmamento dialuna, aunke e mandatario a sigura cu tin mas na caminda, ‘asina cu nan keda cla cu nan achterban’ y lo por dicidi di tambe firma acerca. No tin deadline pa firma segun e mandatario, y de hecho por firma te hasta despues cu e protocol converti su mes den un ley, mas probablemente 1 di september awor. De Meza a bisa cu e protocol, ta confirma cu tin un acuerdo entre partidonan, y cu por conta cu un sosten di e gruponan participe. No ta conoci ainda cua sindicato ni gremio tin cu firma y lo firma ainda, ni, fuera di Camamara di Comercio, cua a bisa cu nan no ta firma, bou di ningun circumstancia. Pero de hecho si nan no firma, e ley ta wordo pasa, y ta parlamento ta esun cu tin e ultimo palabra si ta pasa e ley aki of no. Pues si e gremionan cu no a firma ainda, firma despues ta bon, pero si nan no firma, ta comprendibel, pero e contenido di e protocol ta wordo traha den un ley y pasa pa 1 di september proximo.