Oduber: Si retiro di AHATA ta delibera, ATA de hecho ta plat!

ORANJESTAD - Si e miembronan di AHATA cu a retira 'en bloc' for di e directiva di ATA diaranson a haci esaki como AHATA, esey ta nifica cu tin un problema serio y cu de facto ATA ta 'plat'. Plat den sentido cu no por tuma ningun desicion pa placa riba 10.000 florin por lo pronto. Asina minister di turismo Otmar Oduber ta interpreta e situacion actual di retiro y ta nenga di pensa cu AHATA a haci esaki deliberadamente como nan 'carta' contra gobierno pa mustra nan poder. NoticiaCla.com sinembargo tin informacion cu AHATA a haci esaki deliberadamente y a dicidi cu como AHATA ta retira y lo no a haci esaki 'a titre personal'. Asina e mandatario a reacciona durante e programa radial noticiacla-merdia na power 101.7 merdia. 

SCOHE MIEMBRONAN NOBO

Segun e mandatario, a manda un carta pa AHATA pa, conforme ley, nan confirm'e di e retironan manera cu a keda anuncia, y pa den 48 ora manda un lista di 6 nomber for di cual por scohe 3 miembro 'nobo' pa reemplasa esnan retira. E ora no tin problema y ta 'business as usual'. Esaki pasobra esey ta nifica cu e retironan tabata a titre personal, sin un meta specifico. Pero si e meta tabata orchestra pa AHATA, e ta pues bira un problema serio. Y e mandatario no kier pensa mes den e direccion ey.