Bosman: VVD kier sa detayes di e deal cu gobierno a cera cu CITGO

DEN HAAG - Pa medio di un serie di pregunta manda na minister di asuntonan di reino y di relacionan exterior, parlamentario Hulandes Andre Bosman (VVD) a cuestiona e deal di CITGO recientemente. E lista di 17 pregunta a wordo entrega dia 20 di juni ultimo. Algun di e preguntanan ta interesante den sentido cu kier sa e envolvimento di Hulanda den varios aspecto di e deal aki. 

PREGUNTANAN

Entre e preguntanan, e parlamentario na nomber di su fraccion kier sa e.o. cuando placa e deal ta genera pa Aruba y si esaki enberdad ta 50 miyon. Kier a haya clarificacion di ken exactamente ta cumpra e refineria y ken tur a firma e contracto, pa cuanto el a wordo cumpra y cuanto belasting lo bay paga. Tambe loke ta hala atencion y loke cu e parlamentario a bisa NoticiaCla.com un tempo atras caba, ta te con leu por compara e compra aki cu e compra di e refineria ISLA na Corsou. 

INVOLUCRACION DI HULANDA 

Loke ta interesante ta cu kier sa te con leu Hulanda ta involucra den e compra di e refineria, tambe si Hulanda por wordo teni responsabel pa eventual debe como consecuencia di e compra di e refineria. E parti di gas tambe ta hala atencion unda cu ta puntra te con leu Hulanda ta 'yuda paga' pa e instalacion di un pipa di gas for di Venezuela pa Aruba, cuanto e ta costa, y si a tene destaho publico caba y si tin plan di e pipa di gas aki caba. 

REFINERIA MAS BERDE

E hecho cu kier comberti e refineria den un mas berde tambe ta wordo cuestiona. VVD ta puntra kico ta pasa si e pipa di gas no bira un realidad, con e refineria lo atende cu e problema aki. Ademas e informacion cu lo por uza e escape di gas pa crea algas y cuanto ta costa pa instala un sistema asina, y mas ainda kico e risico ta si e sistema resulta di no por crea e algas aki y mas ainda, ken tin cu carga e risico financiero. Lesa e preguntanan original aki.