Kiwanis Club of Young Professionals Aruba a celebra nan promer lustro

ORANJESTAD - Recientemente Kiwanis Club of Young Professionals Aruba (KYPA) a celebra su di cinco aniversario. Esaki a sosode durante un celebracion na Hilton Resort & Casino. Un anochi sigur ameno cu presencia di miembro nan y tambe Fellow Kiwanians nan di otro club cu tabata presente pa celebra e momento asina special. KYPA sigur no ta desconoci, pa gran mayoria ta consisti di diferente profesionalnan hoben cu tin e curason pa haci trabounan voluntario y cu sigur lo kier haci un diferencia den nos comunidad. 

Presidente actual Brian Croes a dedica bunita palabranan di danki y tambe kico amor pa trabounan boluntario ta nifica. No por a laga e momento pasa, sin gradici cada un Presidente saliente cu tambe a ricibi un bunita gesto. Prome President tabata Andre Kelly cual te ainda ta un motor tras di e club y actualmente ta Advisor di K-Kids Princess Amalia Basisschool. Sigui pa e presidentenan: Lay Hing de Kort - Yee, Carlos Lopez y tambe Rendell de Kort. Cada un sigur cu nan merito- y logronan satisfactorio durante nan aña. 

Brian Croes tambe a duna un danki special na tur ‘Charter members’ cu a cuminsa cu e club y te ainda t’ey presente. Ta masha aprecia tur nan ora nan liber cu ta dedica na KYPA y nos comunidad. Sr. Gavril Mansur di Kiwanis Palm Beach tambe a hiba palabra durante e ceremonia y asina conta con ideanan a cuminsa bin dilanti cinco aña pasa, pa crea un club hoben y dinamico. KYPA sigur ta gradici Kiwanis Palm Beach, cu semper t’ey pa brinda apoyo. Tambe ta gradici tur persona-, instancia- y tambe companianan cu a support KYPA durante su cinco añanan y sigur lo tin hopi mas aña pa celebra y duna bek na nos comunidad.