Estudio di studiante di Universidad di Aruba encuanto acoso sexual

ORANJESTAD - Proximamente lo tin un estudio di studiante di Universidad di Aruba encuanto acoso sexual. Falta di concientisacion y datonan tocante acoso sexual na pia di trabou ta haci dificil pa yuda of proteha un victima. P`e motibo aki ta existi e necesidad pa investiga si tin un cantidad (halto) di casonan cu ta sosode den organisacionan na Aruba cu no ta wordo raporta. Concientisacion ariba e tema aki lo percura pa un miho reglamentacion. 

LUNANAN DI INVESTIGACION

Den e siguiente lunanan lo tin un investigacion cu lo wordo conduci pa un studiante di e Departamento  di  Organization, Governance & Management na e facultad di Arts & science na Universidad di Aruba, Jezabel Stamper. Esaki ta un investigacion hopi importante relaciona cu finalisacion di su estudio riba e tema di Acoso Sexual na pia di Trabou. Como un studiante, ta su deseo pa contribui na e area di maneho di organisacion cu un tema specifico cual ta acoso sexual. E meta di e investigacion aki ta pa purba haña sa den ki grado e presencia di acoso sexual ta presente den e organisacionnan na Aruba. ‘Tin falta di informacion y estudio haci riba e topico aki na Aruba. Alabes, ta sinti cu falta concientisacion riba e tema aki den nos comunidad. P’e motibo aki ta importante pa stimula tur esnan envolvi den e forsa laboral di Aruba pa participa den e encuesta aki’, Stamper a splica. E meta di e estudio aki ta pa acumula data y procesa e informacion cu lo sirbi pa mehora reglamento y procedura di organisacionnan local. E investigacion aki lo wordo haci via un encuesta online. Tur informacion di e investigacion aki ta anonimo y confidencial. E encuesta aki ta pa tur persona den sector laboral cu ta 18 aña of mas di edad y tin expereiencia di trabou. Adicionalmente, organisacionnan local lo wordo acerca pa asina tambe forma parti di e investigacion aki. 

PETICION PA PARTICIPACION

Pa un resultado mas representativo posibel referiendo na e tema, ta haci peticion pa personanan cu a experencia acoso sexual como tambe na esnan cu no tabata tin un experiencia asina pa nan tambe participa y yena e encuesta aki. E encuesta lo ta disponibel riba e siguiente web link https://www.surveymonkey.com/r/FL8M62P Ta encurasha comunidad pa comparti e link aki cu famia, amigo y coleganan pa duna un man y contribui pa trece mas concientisacion  y yudansa na tur persona cu a yega di experiencia Acoso Sexual na Trabou aki  na Aruba. 

CONTRIBUCION TA IMPORTANTE

No laga falta di informacion limita yudansa y protection pa e victimanan.  Rason pa cual ta importante pa haci e investigacion aki. Bo contribucion ta hopi importante y aprecia. Cada encuesta registra lo yuda finalisa e investigacion importante aki cu lo contribui pa colecta informacion ariba e tema aki cual resultado lo wordo analisa di manera cu lo por contesta e pregunta ‘ Den ki grado acoso sexual ta presente den nos organisacionan na Aruba.’

E resultado di estudio haci lo wordo presenta na e Department of Organization, Governance and Management (OGM) na e facultad di Arts and Science na Universidad di Aruba y lo wordo publica den medionan di comunicacion.