Edgar Davids cu proyecto 'di comunidad pa comunidad' na Aruba

ORANJESTAD - Conocido ex futbolista internacional Edgar Davids ta introduci proyecto “di comunidad pa comunidad” na Aruba. Recientemente a tuma luga un reunion entre minister di Deporte, dr. Alex Schwengle cu e futbolista estelar cu a presenta na e mandatario su programa di escala chikito, pero completo, cu ta iniciativanan di e estilo “di comunidad pa comunidad”. E canchanan di futbol, cu ta wordo uza pa eherce diferente deporte y ta inclui un area cu structuranan permanente pa train musculo y resistencia.

DISEÑO DI CANCHA

E canchanan y structuranan ta diseña accesibel pa personanan di tur edad. Edgar Davids ta sali di e punto di bista cu haci deporte mester ta dibertido. Un persona cu ta diberti su mes ta haci su best, haciendo su best e ta bira miho den loke e ta haci, y asina ta mas motiva ainda pa haci ainda mas su best. Esaki ta un circulo cu e kier encurasha cu e introduccion di e proyectonan “di comunidad pa comunidad”.

INICIATIVA DI COMUNIDAD

E proyecto cu Davids ta encabesa ta bay a base di iniciativa for di comunidad. E ta ofrece e canchanan, pero comunidad mester kier e proyecto y traha na realis’e. Di e forma aki e proyecto ta bira sostenibel, como cu e comunidad ta sostene y percura pa su mantencion.

MATCH PERFECTO PA SAN NICOLAS

Schwengle a bisa cu e proyectonan aki ta un “match” perfecto pa comunidad di San Nicolas. Ya caba diferente persona di e districto aki a acerca e mandatario cu e peticion pa crea mas oportunidad pa recreo asina y el a bisa cu e ta bay papia cu su coleganan minister, particularmente Minister Mike de Meza tocante e iniciativa di Edgar Davids pa su introduccion na San Nicolas.

PASADO DI DAVIDS

E minister a splica cu Davids ta bin di un bario unda tin hopi problema, y ora cu el a logra ta exitoso den su deporte y den bida e no a perde e conexion cu su pasado. Davids awor ta bolbe bek, como futbolista exitoso, y ta duna bek na su comunidad y otro comunidadnan rond mundo pa medio di su fundacion cu ta enfoca riba “street soccer”.