Diferencia di opion entre ATIA y KVK riba firmamento protocol AZV

ORANJESTAD – E protocol di AZV ta wordo firma dialuna atardi, pero esaki ta bira un firmamento cu sosten minoritario. Y mes momento tin un diferencia di opinion entre ATIA y KVK riba e protocol aki. E firmamento inicial (aunke considera como un acto ceremonial segun representante di gobierno Bark Kool) mester a tuma lugar diahuebs siman pasa. Esaki a keda posponi literalmente ultimo ora cu, ora cu gobierno a laga sa cu nan no ta ‘alcansa’ debi cu tin schedule conflictivo. Gremionan social si tabata presente y mester a bay cas sin firma.

E diferencia di opinion entre e gremionan ATIA y KVK riba e firmamento di e protocol di AZV a bira conoci ora cu ATIA dialuna a manda un comunicado (lesa e comunicado aki) cu ta stipula 6 punto pakico ATIA si ta firma e protocol. Camara di Comercio mientrastanto a confirma na NoticiaCla caba for di siman pasa, cu nan di otro banda, no ta firma e protocol aki. Y su splicacion tabata hopi simple y cla.

ATIA sinembargo di nan banda, ta duna un splicacion amplio di loke a sosode prome cu a yega asina lew pa tin un protocol y pakico nan si ta firma e protocol. Nan ta repasa entre otro cu e opcion cu gremionan social (incluyendo KVK) tabatin ta pa sea acepta 1% di impuesto igual na BBO, pa yuda AZ, of aumenta prima di AZV cu 3% di entrada y salario, cu tin cu wordo paga directamente door di dunado di trabou y trahado. Segun ATIA su comunicado tambe, ta papia cu dunadonan di trabou y trahado a acepta e recomendacion di parti di gerencia di AZV pa introduci un ‘bijbetaling’ y ‘eigen bijdrage’. Y mas importante, cu gobierno pa medio di minister di salud, a compromete pa evalua y baha gasto y eficiencia di gobierno. Condiciona riba esey, ATIA a dicidi cu nan ta firma e protocol, y ta pone 6 punto specifico.

Camara di Comercio, di otro banda ta bisa cu tanten cu nan no mira gobierno actua prome, esta prome cu e protocol wordo firma, nan no ta firma nada. “Prome cu gobierno pidi pueblo pa aporta mas na AZV via prima of BBO, gobierno mester demostra cu e ta corta su gastonan tambe di un manera mas structural. Y esey no a pasa” Tromp a bisa NoticiaCla siman pasa diabierna. “Como tal Camara di Comercio no a mira e motibo pa cambia nan punto di bista riba firma. “Prome cu nos firma algo, gobierno tin cu baha su gastonan” Tromp a finalisa bisando na Noticiacla.com.