Aruba Summer Music Festival 2016 cla pa ranca sali!

ORANJESTAD - Aruba su temporada di festival ta den full swing y e scenario di Harbor Arena ta kedando cla pa Aruba Summer Music Festival tuma lugar. Aruba Tourism Authority ta orguyoso di ta co-patrocinador di e evento grandi aki cu ta priminti di ta uno memorabel.

MAS DI 3 MIL CARCHI BENDI

Te cu siman pasa e bentanan online internacional for di Merca, Venezuela, Region di Caribe, Colombia y Argentina tawata na un total di 2.500 ticket, pero na e forma actual cu e ta trending e lo surpasa riba 3.000 ticket e siman aki.

CANTIDAD DI PRENSA INTERNACIONAL

Festivalnan manera Aruba Summer Music Festival y Soul Beach Music Festival, pero tambe diferente otro cu ta y a patrocina durante añanan, ta trece no solamente bishitantenan extra y nobo di exterior, pero tambe atencion di prensa mundial pa nos isla durante den e caso aki un luna di juni cu ta mas abou cu normal. Pa loke ta e prensanan internacional bishitando Aruba pa e evento aki ta spera un total di 33 prensanan for di entre otro Merca, Colombia, Venezuela, Brazil y Corsou. 

Loke A.T.A. ta hinca aden na sponsorship, ta bin bek hopi biaha multiplica den cobertura di prensa internacional como tambe den un variedad di mercadonan unda nomber di Aruba ya ta resona of na unda e nomber di nos isla ta nobo ainda. Den e contexto aki A.T.A. ta pone metanan agresivo cu contractualmente ta acorda cu e organisador(nan).

PROME ANOCHI

Aruba Summer Summer Music Festival ta habri e prome anochi den ambiente di reggaeton y EDM. Headliners pa e anochi ta dos nomber grandi den e genero aki: Wisin y Chino & Nacho. E Portoriqueño Juan Luis Morera Luna conoci como Wisin, ya caba tabatin un trayectoria di exitonan grandi riba henter e continente Latino-Americano como mitar di e duo Wisin y Yandel. Awo como solista, Wisin cu 6 miyon followers, ta keda score hit tras di hit, entre otro colaborando cu artistanan manera Carlos Vives y Enrique Iglesias. For di Caracas, Venezuela, Chino (Jesús Alberto Miranda Pérez) y Nacho (Miguel Ignacio Mendoza Donatti) ta trece nan style unico di reggaeton y musica tropical. E duo aki cu 10 miyon followers, ta un di e gruponan Venezolano cu mas reach riba nivel mundial. E componente electronico no por keda afo e anochi aki y p’esey Aruba su propio estreya di EDM, NutzBeatz, lo trece ambiente riba e scenario di Harbor Arena.

DI DOS ANOCHI

E di dos anochi ta bay ta uno di pop y salsa, cu presentacionnan di Tito Nieves, Gente de Zona y Enrique Iglesias. Tito Nieves ta sin duda un di e gigantenan den e mundo di salsa di e ultimo tres pa cuater decadanan, unda el a traha entre otro cu Hector Lavoe y Conjunto Clasico. Nieves cu 100.000 followers a logra exitonan clasico den su genero manera 'El Amor Más Bonito'. E grupo Cubano Gente de Zona (cu 1.5 miyon followers) a score rond mundo recientemente cu e exito ‘Gozadera’ hunto cu Marc Anthony. Na 2014 nan a explota den mundo di pop Latino cu e hit ‘Bailando’ cu nan a graba hunto cu Enrique Iglesias, ken tambe lo bay duna su presentacion e mesun anochi riba escenario di Harbor Arena. Iglesias -cu 51 miyon followers- no mester un introduccion. Desde cu el a lansa su mes den añanan ’90 e ta score exito tras di exito.

DI TRES ANOCHI

Di tres anochi ta den ambiente di musica bailabel y soca, cu presentacionnan di Youth X-treme, Tsunami, N’Fusion, D’Licious y for di Trinidad, Destra Garcia. Youth X-treme, Tsunami, N’Fusion y D’Licious ta representa e miho di loke nos bandanan local ta desplega y ta garantia riba nan mes caba di un tremendo anochi di fiesta. Destra Garcia, conoci como ‘The Queen of Bacchanal’ ta un di e streyanan mas grandi den e genero aki. Su exito ‘Lucy’ ta un di e canticanan cu mas a zona riba caminda durante temporada di carnaval di e aña aki.