Cos a bolbe tranca entre FTA y Kooyman net prome cu firma CAO

ORANJESTAD – Despues cu tur cos tabata cla pa firma un CAO nobo entre e sindicato FTA y Kooyman, a cancela esaki abruptamente. Atardi a sali na cla cu cos a pega atrobe net prome cu e firmamento. Den un comunicado di Kooyman, nan ta mustra cu awemainta FTA a propone un condicion nobo, cu a conduci cu e plan pa firma e acuerdo 1or di merdia, a wordo cancela door di Kooyman. E condicion nobo proponi ta exigi pa Kooyman paga orarionan di trahadornan cu a welga. 

RESPETA NO WORK NO PAY

Segun Kooyman, nan ta respeta e derecho di cada trahador pa welga. E mesun derecho cu dunador di trabou ta dispone di dje pa no paga orarionan di welga, cu e principio di ‘no work no pay’. Kooyman nunca a indica durante negociacion di CAO cu lo paga orarionan di trahadornan cu welga. Kooyman ta lamenta cu sindicato FTA a kies pa net prome cu e firma official di CAO pa incorpora un extra condicion. "Ambos partido a traha duro pa yega na un acuerdo di cual e maximo resultado a wordo logra. Nos ta hopi desapunta cu nos ta wordo confronta na es forma aki cu un condicion nobo di cual nos no por coresponde" Juri Kooyman, Sr. Manager Operations di Kooyman a bisa den e comunicado."Kooyman ta confia cu sindicato FTA ta respeta e acuerdo logra y renuncia na e condicion nobo pa asina ambos partido bay over na firma e acuerdo di principio di CAO".

BEZWAAR COMISSIE

Den un combersacion cu Kooyman atardi, NoticiaCla.com a compronde cu e combersacionan ta poni pa continua diamars otro siman cu mediado di gobierno. Un punto cu nan a trece aden y of kier evalua, ta e introduccion di un asina yama 'bezwaarcomissie' pa ora di conflicto. A puntra un siman tempo pa abogadonan di cada partido debati riba dje y pa despues continua cu e reunion. Kooyman a lamenta na NoticiaCla.com cu e situacion a bay asina atrobe y cu no por a firma ainda.