NV ELMAR realisando proyectonan grandi y introduciendo innovacion

ORANJESTAD - NV ELMAR ta realisando proyectonan grandi y introduciendo innovacion. E compania responsabel pa e distribucion di coriente na Aruba, NV ELMAR den e prome seis lunanan di aña 2016 a cuminsa cu algun proyecto sumamente grandi cu ta inclui introduccion di innovacion y preparacion pa cambionan impactante den infrastructura.

USO DI LED LIGHTS

Director di NV ELMAR, Robert Henriquez ta splica cu na 2015 a cera dos acuerdo pa financiamento pa ehecuta dos di e proyectonan mas importante pa NV ELMAR. Ademas di e proyecto andando caba rond Aruba, cual ta encera e cambio di tur meter di casnan y negoshi pa “smart meter”, NV ELMAR a cuminsa un otro proyecto cu ta cubri ful e isla, esta e cambio di tur luz di caya pa lampinan di e tipo Light-Emitting Diode (LED).

REEMPLAZANDO 9000 LAMPI EXISTENTE

Ta reemplasando e 9000 lampinan existente actualmente, y ta agregando 3000 lamp mas, pa un total di 12 mil lampi. E ta tecnologia nobo, innovativo y den e proceso aki Aruba ta un “frontrunner” den Caribe, segun Henriquez. E lampinan LED no solamente ta un instrumento importante den e proceso pa introduci mas sostenibilidad den operacion y procesonan, pero – como cu nan ta ekipa cu tecnologia moderno, e lampinan tin un sistema di comunicacion cu ta aumenta eficiencia y efectividad di trabao pa NV ELMAR. 

EKIPA CU SISTEMA DI COMUNICACION

Henriquez ta splica cu cada lampi LED nobo cu ta wordo instala actualmente ta ekipa cu un sistema di comunicacion cu ta facilita e tecniconan di NV ELMAR den nan proceso di chekeo di e lampinan. E sistema ta indica e estado di e lampinan, esta si nan ta funciona optimal, si tin problema of si e lampi ta paga.  E proceso di reemplasa e lampinan a cuminsa na Noord y poco poco lo cubri henter Aruba. E proyecto ta programa pa keda cla den dos aña di tempo.

Un otro proyecto andando ta e proceso pa hala kabelnan di coriente pa acomoda e proyecto di caminda conoci como Green Corridor, principalmente unda cu e rotondenan ta ubica. E prome parti, esta di e futuro rotonde di Mahuma te cu e rotonde di Pos Chiquito ta bayendo bon, y siguientemente ta sigui cu e parti di Pos Chiquito bay pariba.

E kabelnan aki ta fungi como e adernan principal pa sumistro di coriente, y mester pasa rond di e rotondenan. Pa e proyecto ta conta cu un team di tecniconan di Aruba y Hulanda y e bon colaboracion di parti di DOW y WEB.

E proyecto a bin cu su retonan, segun Robert Henriquez, pero danki na bon afspraaknan haci cu WEB y DOW y e bon guia di e tecniconan, e ta bayendo bon den su ehecucion.

Un di tres proyecto, esta esun pa cu instalacion di kabelnan nobo riba e ruta di e futuro Watty Vos Boulevard ta den su fase di planning actualmente, Henriquez ta comenta.

Tur dia NV ELMAR ta move mas y mas den direccion di mas innovacion y asina ta poniendo un “stempel” den Caribe como un compania cu ta innovativo y sostenibel.