Polis di luto pa fayecimento di Sub Inspector Clyde Peterson

ORANJESTAD -Tabata dia 5 di april ultimo cu Cuerpo Policial Aruba a celebra cu e Polisnan cu a alcansa 30aña di trabou, precisamente e klas cu a cuminsa sirbi nan pais dia 15 di januari 1986, ora cu apenas nos isla a drenta Status Aparte. Sub Inspector Clyde Peterson tabata den e grupo aki y diaranson mainta el a fayece di forma natural.  Pa 9:00am laga Dr. Chung constata morto di Joseph Clyde Peterson, naci dia 21 di november 1957, pues tabatin 58 aña di edad. Dokter a constata cu su morto tabata natural, pa cual a entrega e curpa mesora na famia.

Clyde Peterson tabata traha como Lago Police ora cu e refineria a cera y na mes momento Aruba a drenta Status Aparte pa cual el a solicita y a bira Polis. El a forma un carera largo den e cuerpo di Polis pa cual el a crece te yega e puesto di Sub Inspector, trahando den e seccion di Polis uniforma na San Nicolas. 

“Nos ta lamenta su fayecimento masha, pasobra no solamente como cuerpo nos ta perde un colega y un amigo, sino nos ta perde conocemento y hopi experencia”, asina Alto Comisario di Polis, mr. Dolfi Richardson a reacciona. E ta corda cu na april ultimo ainda Clyde Peterson tabata hunto cu su yiu muhe den su oficina pa ricibi su decreto gubernamental pa su 30 añanan di servicio y dedicacion na comunidad. Ta dos Polis cu ta fayece den e ultimo simannan aki, cu sigur ta laga henter e cuerpo den luto y tristesa. Cu Clyde Peterson sosega na paz. Forsa na su dos yiunan cu a keda atras, su famia, coleganan y amigonan cu ta stim’e hopi.