KvK: No ta retira sosten pa carta di AHATA riba ley all inclusive

ORANJESTAD - Camara di Comercio no ta retira nan sosten na e proposicion di e organisacion hotelero AHATA (Aruba Hotel & Tourism Association) pa loke ta e sugerencia den caso di e ley di all inclusive. Asina e gremio comercial a contesta minister di turismo Otmar Oduber den un carta fecha 21 di juni, 2016 esta diamars. E carta ta contesta e peticion di Oduber haci un dia prome durante un reunion cu e gremio, unda cu Oduber (segun e carta di KVK) kier pa e gremio revoca nan sosten na e carta di AHATA fecha 17 di juni ultimo. 

NADA ROBES PIDIENDO MAS TEMPO

Den su motivacion, KvK ta splica e mandatario cu semper a wak e carta di AHATA como un proposicion. "KvK ta sigui kere den e concepto di e proposicion, aunke cu ta logico (manera ta e caso cu cualkier proposicion) cu e detayes (manera e tempo) por wordo discuti. Como tal KvK no ta mira nada malo den sugeri pa mas tempo pa por adkeri mas informacion, hasta ora cu e ta reconoce e prerogativo di gobierno pa no bay di acuerdo cu e proposicion, especialmente si un of mas di e partidonan envolvi scoge pa no bay di acuerdo cu e espirito reciprocal di e tipo di acuerdo ey". 

KVK NO A CAMBIA

Mes momento KvK ta bisa cu nan posicion no a cambia den e sentido cu ta logico cu e cambionan rapido den industria turistico ta rekeri cambio di ley y regulacion pertinente. "Sinembargo, den cuadro di esaki KvK no ta considera apropia pa retira su sosten na e iniciativa (di AHATA)", e gremio comercial ta finalisa bisando den e carta firma pa e presidente Daphne Agius Cesareo y e directora Sonja Velthuizen. 

MINISTER RIBA KVK

E mandatario apenas dialuna ainda den un conferencia cu prensa a mustra cu KvK a keda sorprendi cu e informacion suministra pa su persona riba e reunion cu AHATA y nan a keda mas bien 'confundi' y cu nan lo a bay den nan seno pa determina nan proximo paso den e proximo  24 pa 48 ora. E carta di ayera, ta e resultado di e analisis di e reunion cu minister y AHATA di e ultimo dianan.