Ex director Oslin Boekhoudt a perde su caso contra WEB

ORANJESTAD - Ex director di WEB Aruba NV Oslin "OJ" Boekhoudt a perde su caso den corte contra su doño di trabou. Mientras cu Boekhoudt a bringa su retiro ,-segun su persona, inhusto-, e meta principal tabata pa e ricibi daño y perhuicio. Corte a rechasa su peticion y a cobra e ex director e gastonan di e caso. 

ARGUMENTONAN DI BOEKHOUDT

Den e caso segun Boekhoudt, e ta haya cu e retiro no a cana e caminda corecto. Ademas e ta considera e forma con el a wordo manda cas, como difamante pa su persona. Ademas e motibonan pa e retiro segun Boekhoudt, no tabata valido. Y e compensacion ricibi no ta cuadra a base di su funcion y su edad. Corte a tende di Boekhoudt, cu e ta haya cu WEB a uza motibonan falso y te hasta 'fofo'. 

ARGUMENTO DI CORTE

Corte a analisa e argumentonan di Boekhoudt, pero no a bay di acuerdo cu su ponencia. Segun corte, ta nombra un director statutorio a base di su cualidad personal, cu ta forma un base importante di confiansa pa e negoshi por desaroya y haci ganashi. Cu esey, e confiansa ey por deteroira na cualkier momento y por tin como consecuencia cu e director por haya su retiro. Esey ta hustifica hopi biaha e salario halto mirando e posicion vulnerabel di e persona como director. Esey pasobra si algo bay robes, e ta conduci na retiro di e persona aki. Hues a compara e retiro di un director y un empleado 'regular'. Aki a mustra cu den caso di un director, corte lo dicidi menos lihe pa e director, compara cu un trahado 'regular'. Pa loke ta e retiro invalido, e hecho cu Boekhoudt a bay di acuerdo cu e 'desicion di retiro', e ta acepta tambe cualkier 'invalides' cu lo tabata supuestamente den e desicion di retiro. Riba e consecuencia pa Boekhoudt, corte a mustra cu e consecuencia si Boekhoudt a keda como director statutorio di e compania ta mas pio pa WEB cu pa e ex director. Sigur si ta basa e funcionamento di un director a base di confiansa. Algo cu no tin aworaki mas. Esey no ta kita afo cu corte ta considera e consecuencia pa Boekhoudt tambe como pisa. Sinembargo, no mes pisa cu pa WEB. Como tal den su sentencia, corte a rechasa peticion di Boekhoudt. Lesa e sentencia aki.