A firma e decreto pa haci Sector Primario completamente liber di impuesto

ORANJESTAD - Oficialmente Gobierno a firma e decreto cu ta haci e sector primario completamente liber di impuesto. E anuncio a bin dialuna mainta durante e firmamento pa embeyece e area di piscado na Zeewijk. "Esey ta nifica cu tur material no algun material, manera anteriormente, pero tur material ta liber di impuesto. Esaki ta inclui tambe 'winstbelasting' y 'inkomstenbelasting'. Di e forma aki nos kier encurasha pa mas y mas hende practica e ofishinan aki den sector primario." Minister encarga cu e cartera Otmar Oduber a indica.   

Banda di incentiva mas hende pa practica tanto pesca como cria di bestia, kier logra tambe un aumento den produccion pa consumo di nos comunidad. Sr. Oduber ta comenta cu a dialoga e deseo aki cu hopi di esnan cu ta practica e ofishinan aki na varios ocasion y awor ta asina leu cu a logra esaki. "E ta un fase hopi importante y cu hopi satisfaccion nos por anuncia awe cu henter Sector Primario ta liber di impuesto." Awor piscadornan por practica pesca hopi mas trankilo mirando cu liber di impuesto lo traduci den reduccion substancial den prijs di ekiponan y materialnan cu nan mester pa eherce e ofishi. 

Banda di haya e grato noticia cu henter e area di beach na Zeewijk / Cura Cabay lo conoce un embeyecemento y mehoracion na beneficio di henter e area, e piscado ta comparti cu e sorpresa agradabel aki ta algo cu tur ta aprecia masha hopi mes.