Club Universal ta celebra fiesta di San Juan den forma di kita sombre

POS CHIQUITO - San Juan ta bin, San Juan ta bay...at'e cu'e palo den man, e ta cla pa mata e gay'......Diabierna awor directiva nobo di Club Universal ta habri portanan di club hancho hancho pa hunto cu habitantenan di bario y tur otro parti di Aruba bin gosa di un tremendo celebracion.

Laga tur stress un banda y bin rek e pianan, gosa, participa y disfruta di nos fiesta cultural 'Dera Gay'. Un fiesta digno di su pueblo. Celebracion ta cuminsa ya for di 6'or di atardi y ta caba pa banda di 9.30. Den cushina unda Catarina ta dirigi cu man fuerte tin na benta cumindanan tipico manera sanger yena, sopi di cabrito, pan cu spam y banana hasa, kroket, pastechi y mucho mas. Tambe lo tin cos dushi specialmente pa kibra dieet y cu pa su mayan toch ta cuminsa di nobo. Musica ta den man di grupo di Ruben pa despues cu a mata e gay por sigui baila un rato mas. Corda bin un y tur. Fiesta di cosecha cu antes tambe tabata wordo celebra tur afo. Ban rindi honor na nos cultura. Bin y pasa bon. Nos ta warda bo.