RBM Estates NV lo bringa sentencia riba tereno(nan) na Bubali

ORANJESTAD - E compania RBM Estates NV lo bringa e sentencia dicta recientemente cu hues a dicta den e caso entama pa Stichting Aruba Birdlife Conservation contra Land Aruba. Asina abogado Geoffrey Wever di e bufete De Cuba Wever a confirma na NoticiaCla.com. Ta trata di un 'derdenverzet' cu lo tuma lugar segun e abogado a splica. Por considera esaki como un reaccion directo di e veredicto di dia 7 di juni. Aki hues a prohibi gobierno di Aruba pa sigui duna tereno erfpacht y prohibi tambe pa permiti continuacion di cualkier desaroyo riba tres tereno na Bubali cu ta wordo considera como tereno 'berde'. 

COMPANIA A SALI PERHUDICA 

RBM Estates NV a sali perhudica den e caso aki mirando cu nan ta (un di) e compania(nan) cu tabata desaroyando un proyecto riba e tereno(nan) cu ta den disputa den e sentencia. Mas specifico, nan ta responsabel pa e proyecto conoci como "Las Olas", y segun e abogado, "ta parti di un grupo cu a y ta invertiendo hopi den pais Aruba y tin varios otro proyecto grandi na Aruba". "Nos a cuminsa un derdenverzet ya cu RBM Estates NV ta wordo perhudica dor di e veredicto di 7 di juni ultimo, mientras RBM Estates NV no tawata partij y tampoco RBM Estates NV tawata na altura, dus RBM Estates NV no por a defende su posicion", e abogado a sigui bisa. "Nos ta kere cu ta importante pa hues scucha tambe e posicion di RBM Estates NV". A compronde cu tanto Stichting Aruba Birdlife Conservation como Land Aruba lo wordo scucha den e caso y por defende nan interes. E caso lo tuma lugar e siman aki den corte di Aruba. 

E VEREDICTO DI DIA 7 DI JUNI

Tabata dia 7 di juni ultimo cu corte den un sentencia a prohibi gobierno di Aruba pa otorga tereno den erfpacht y mester tene su mes na e ROP (Ruimtelijk Ontwikkelingsplan) manera stipula na 2009. E hecho cu ta trahando hotel riba e terenonan ey, ta empugna cu e ROP. E percelanan stipula ta tereno 'berde' y como tal no mag tin construccion eyriba. Tambe Corte ta di opinion cu gobierno mester tene nan mes na e ROP ora di maneha tereno domeingrond y otorgamento di tereno erfpacht, a lo menos cu tin motibonan pisa cu pa desvia di e ROP. Den e caso aki sinembargo, gobierno no a logra indica pakico mester a desvia di e ROP den e caso aki. Como tal, door di otorga tereno den erfpacht of door di permiti cu ta laga rosa tereno cu tin un destinacion 'berde', gobierno ta viola ley. E intencion di e caso sumario di Aruba Birdlife Conservation (ABC) tabata pa evita cu ta otorgando tereno berde pa traha proyectonan hotelero eyriba.