Guera publico riba ley all inclusive creando mas division cu union

ORANJESTAD - E guera publico riba ley di all inclusive a continua dialuna, lagando gobierno y AHATA 'batayando' otro uzando argumentonan pa convence nan punto y di otro banda importadornan di producto splicando nan banda, y gremionan comercial kedando posiblemente mas confundi. Por lo menos segun e informacion suministra. Y mientrastanto, no tin fecha pa e ley di cambio di all inclusive wordo trata. Cada banda ta para riba nan punto, y ta haciendo hopi esfuerso pa mustra cu nan punto ta esun corecto. Y por casi bisa cu el a cuminsa bira un bataya di forsa cu por wordo midi segun avisonan publica. 

UZANDO MEDIA PA PROBA NAN PUNTO

Minister di turismo Otmar Oduber a inicia su 'defensa' dialuna uzando e.o. literatura obteni (riba su peticion) di World Tourism Organization riba e tema di all inclusive, AHATA uzando informacion economico via un aviso, importadonan di producto treciendo un realidad segun nan di 'bullying', y gremio comercial meymey purbando di haya mas claridad. Cada grupo ta desmenti argumentonan di otro, indicando cu loke ta wordo presenta di un, no ta berdad pa e otro. Mientrastanto e consumidor tin cu kere loke e ta wak. 

GREMIONAN DEFRAUDA?

Segun Oduber durante su splicacion na prensa dialuna atardi, el a conta cu ela sinta cu e dos gremionan KvK y ATIA cu segun e mandatario su opinion, a keda 'defrauda' pa e loke cu nan a wordo bisa pa AHATA den un reunion diabierna. "Awor nan lo bay den nan seno den e proximo dianan pa determina nan posicion" Oduber a bisa NoticiaCla.com. Oduber a splica e gremionan dialuna mainta di e 'malinformacion' cu AHATA lo a duna nan durante nan ultimo reunion. 

ODUBER Y WTO

Pa loke ta e informacion cu Oduber a ricibi di WTO (riba su peticion), a comparti un documento riba e tema di all inclusive, titula "UNWTO, The Impact of all-inclusive resorts in the destinations". Mientras e no ta haci mencion specifico di Aruba, e documento ta splica con cada destinacion por 'reconoce su mes' den e documento y tuma e parti cu ta resorta na dje. Y specificamente un paragrafo cu e mandatario a referi, ta hala atencion. "Na e destinacionan unda cu no tin suficiente pa ofrece e turista pafor di e resort, of unda cu e oferta no ta suficientemente confiabel den termino di siguridad, condicionan higienico of calidad, claramente tin un caso pa e proposicion di all inclusive" WTO ta bisa. "Sinembargo den destinacionan unda cu e oferta pafo di e resort ta rico (na oferta) y confiabel, y ta contribui na enrikesimento di e experiencia di e bishitante, e por ta cuestionabel y oportunidadnan pa involucra e comunidad su participacion den e proposicion di e propiedad all inclusive lo mester wordo explora". Por lesa e documento completo aki. E documento aki (riba pregunta di NoticiaCla.com) tin mas peso cu esun di CHTA (Caribbean Hotel & Tourism Association) cu a desconseha contra e concepto aki. Esey pasobra segun Oduber, CHTA ta actua meramente como un 'sindicato' pa e asociacion hotelero. 

AHATA VS IMPORTADORNAN

Den fin di siman, AHATA a presenta un aviso informando cu contrario na pensamento popular, nan ta aporta sigur na economia di Aruba. Entre cifranan menciona, AHATA ta mustra cu "na 2015, 14 hotel grandi na Aruba a cumpra 75 miyon dollar na alimento y bebida. Di e suma total suma a cumpra 71 miyon (dollar) na companianan local. Pues 95% di nan compranan ta na companianan di Aruba mes". AHATA a publica como parti di un aviso (cu a aparece riba NoticiaCla.com) tambe. Fuera di esey, nan a reuni cu gremionan local diabierna y a splica nan punto di bista riba e ley. Mientrastanto, den combersacion cu algun importador, nan a mustra cu esaki no necesariamente ta berdad. De hecho, a mustra cu no solamente nan no ta cumprando manera cu nan ta pretende, sino ta te hasta bay asina leu di 'bully' cierto di e importadornan, cu e menasa cu 'si no sostene AHATA cu e paro di e ley, lo no cumpra mas di nan'. A compronde cu dependiendo di e tamayo di e importado(nan), e efecto ta mas grandi cu otro. Algun a mustra cu algun hotel a cancela contractonan completo y a opta pa busca (cierto) mercancia den exterior. "Nos ta pro pa hende tin placa (negoshinan) den nan saco. Asina nan por cumpra localmente y e placa ta keda Aruba. E ta duna chens na e comerciante y hende local pa circula placa local" un di e importadornan a sigui bisa. Tin un grupo di importador sinembargo cu si ta sostene all inclusive y ta pensa diferente. Algun di nan, debi na e hecho cu nan tin propiedad hotelero y ta wordo considera e ora como un 'conflicto di interes'.