WEB a devela e monitor di energia sostenibel na Aruba

ORANJESTAD - Web Aruba NV como parti di su strategia ayera a lansa e asina yama 'monitor di energia sostenibel'. E ta parti di e meta pa inclui educacion y "knowledge sharing" y esaki ta unda e idea a bini pa comparti es progreso riba tereno di produccion y generacion di energia cu e comunidad di Aruba y mundo henter. Asina director di WEB Luis Oduber a bisa na e ocasion ey. Prome cu e develo, e director a repasa e historia di WEB su proceso pa yega aki, durante su discurso. 

DEVELO DI MONITOR

WEB pues dialuna mainta a devela e combinacion di fuentenan di energia cu WEB ta uzando pa suministra e pueblo di Aruba cu coriente. "Nos ta bay haci esaki den un forma transparente y continuo. E informacion "bibo" lo por educa comunidad con realmente ta produci energia cu un combinacion di energia sostenibel y no sostenibel pa suministra coriente na e poblacion di Aruba". Mester remarca cu esaki ta e inicio y nos lo optimalisa esaki continuamente pa yuda educa nos comunidad. Por wak y monitor e energia sostenibel di Aruba aki.