Prinses Amalia basisschool contento cu edificio nobo

ORANJESTAD - Siman pasa a celebra un ocacion hopi importante pa Prinses Amalia Basisschool na Seroe Blanco cu develo di e borchi cu ta indica cu e construccion di nan scol nobo a cuminsa. Juffrouw Ruthline Hofman, kende ta cabesante actual di e scol a bisa cu tur hende ta hopi contento cu e desaroyo aki, como cu e ta entre otro facilita e introduccion di modernisacion den enseñansa pa nan scol. “Pa nos esaki ta nifica algo hopi bunita,” Hofman a expresa, como cu nan no lo tin retonan mas cu por ehempel coriente cu ta instabiel y daknan cu ta lek. 

PROBLEMA CU CORIENTE

Actualmente ora cende djis un radio extra e coriente ta bay den ful e scol, el a agrega. E cabesante a remarca cu un caracteristica cu mas nan ta aprecia di e edificio nobo, ta cu lo tin espacionan nobo, como cu actualmente entre otro no tin luga adecua pa haci extra “begeleiding”.

ALUMNONAN MOTIVA

E 310 alumnonan di Prinses Amalia Basisschool ta hopi motiva caba, Juffrouw Hofman a bisa. “Claro cu nan ta hopi contento cu esaki,” el a bisa, y a agrega cu aunke e ta spera cu e scol nobo lo añadi na nan motivacion e no ta kere cu lo tin un cambio grandi den nan actitud, pero si den e forma cu algun cos ta wordo haci. 

PLANNING DI CABESANTE ANTERIOR

El a splica cu e parti mas grandi di ful e planning a tuma luga bou di e cabesante anterior, Juffrouw Mireya de Haseth. E scol nobo no lo conoce un expansion den e cantidad di klasnan. E scol lo keda cu 12 klas, y esey ta un bon tamaño pa un scol, Hofman a bisa.