Henriquez: Reunion riba CITGO a kita hopi duda di ATIA

ORANJESTAD - "Nos ta kere cu e tabata un reunion hopi completo," Michel Henriquez di ATIA a bisa despues di a reuni cu gobierno riba e tema di e deal di CITGO. Segun Henriquez, nan preguntanan a keda contesta na satisfaccion. E reunion den oficina di gobierno na San Nicolas diahuebs tabatin como meta pa bin cu transparencia, pa e gremionan por haya tur informacion tocante di e acuerdo, pero tambe pa por haci pregunta riba e desaroyonan relaciona cu refineria di Aruba.

DUDA KITA

Henriquez a splica cu tipo di reunionnan aki, "ta kita hopi di duda ey fo, bo mes sa, den e ultimo dianan, di diabierna pa awor aki, hopi rumor a core. Ki sorto di compania e ta, di unda e ta, di unda e placa t'ey sali, ken ta doño di kico," pero e representante di ATIA ta splica cu,"nos a haya contesta riba e preguntanan ey awe y mi ta kere cu e ta duna hopi trankilidad tambe loke a wordo haci. Awo nos por bay bek na nos miembresia, comercio di Aruba, anto bisa nan esaki tambe."

ATIA KIER MAS PRESENTACION PA COMERCIO

ATIA, adicional na e reunion aki, ta bay haya mas presentacion separa pa directiva di e asociacion di comercio di Aruba. "Nos a ofrece nos mes tambe pa wak si e team por haci presentacion pa diferente miembro tambe di nos, diferente sector den comercio." E idea, Henriquez ta splica, ta cu comercio local mester por ta bon informa pa nan, como local, tambe por ta parti di e incremento di desaroyo economico, "e spin-off effect lo ta grandi."

Pa e aclaracionnan cu nan a haya durante di e reunion, sr. Henriquez ta splica cu, "ta importante pa sa cu loke a wordo haci ta mescos cu loke a wordo papia, dus cu nos ta bezig ta deal cu un compania Americano cu ta sigur, naturalmente e doño ta keda Petroleos de Venezuela, pero toch nos kier a make sure cu liability, si algo bay robes, paso esey por pasa, paso Venezuela no ta den su miho momento, pero tur e preocupacionnan aki a bin dilanti y a bin siguransa riba mesa." Sr. Henriquez ta bisa cu no por pronostica futuro, "pero toch tin hopi safety measures hinca den dje unda cu si algo bay robes, toch Aruba lo no sali negativo di esaki, pasobra e liability no ta na Aruba, pero cu e compania cu a firma cu ne awor aki."