Hooyboer: Resultado di examen e aña aki miho cu aña pasa

ORANJESTAD -  Resultado di examen e aña aki ta miho cu aña pasa. Asina minister di enseñansa Michelle Hooyboer Winklaar a bisa NoticiaCla.com. Inspector General di Enseñansa y Hoofd Dienst Publieke Scholen a informa Hooyboer-Winklaar di e prome resultadonan di examen pa aña escolar 2015-2016 despues di 1e tijdvak. A base di e resultadonan aki por conclui cu por lo general nos tin miho resultadonan di examen pa loke ta e nivelnan MAVO, HAVO y VWO compara cu aña pasa. Ta pendiente ainda di e resultadonan oficial di EPB y EPI. 

MEHORACION PA HAVO Y VWO

E mehoracion ta substancial specialmente pa HAVO y VWO. Remarcabel ta cu no obstante normanan mas estricto pa por gradua pa HAVO/VWO introduci aña pasa y e aña aki nos ta mira un mehoracion. E normanan mas estricto ta conforme palabracionnan cu Hulanda pa loke ta “diploma gelijkstelling” y cu a conduci na adaptacionnan den nos leynan cu ta regula examen di HAVO y VWO. 

DOS NORMA NOBO INTRODUCI

Ta trata aki di dos norma nobo cu a wordo introduci den fase: 1) e por medio di cifranan di examennan central mester ta un voldoende y 2) e candidato por tin un solo 5 riba su lista di resultado final pa loke ta e kernvakken Nederlands, Engels of Wiskunde. 

HERKANSING

Conforme informacion cu Minister a ricibi por a compronde cu tin varios candidato na e diferente scolnan cu ainda lo mester haci herkansing como tambe “zieken-examens” cu consecuencia cu e cantidad di alumno cu finalmente lo gradua y cu e esey tambe e porcentahe lo ta mas halto despues di 2e tijdvak.  E aña aki por a tuma nota cu diferente scol a adapta y intensiva nan examentraining pa asina garantisa un miho preparacion posibel pa e alumnonan. E mandatario a felicita tur alumno cu a gradua cu e logro importante aki y ta desea tur cu ainda mester haci herkansing hopi exito!