Sindicato FTA y Kooyman a yega na acuerdo di principio

ORANJESTAD - Kooyman diasabra mainta a habri sin ningun stul dilanti of trahadonan protestando dilanti porta. Un scenario  cu pa e ultimo dianan a bira un 'custumber'. Pero cos tabata diferenta awe diasabra mainta. Kooyman y sindicato FTA a yega na un acuerdo di principio awe marduga, cu ta nifica cu diasabra mainta e accion di e trahadonan a para y asina e situacion na Kooyman a normalisa desde 9'or di mainta. E acuerdo di principio mes ta wordo firma diamars awor entre e partidonan. Rudy Geerman di FTA y Juri Kooyman como gerente di e compania diasabra mainta tempran a confirma esaki na NoticiaCla.com. Geerman tabata breve, pero Kooyman tabata mas elabora. 

REACCION KOOYMAN

Segun Kooyman, e acuerdo ta e compania lo paga e trahadonan un suma di 1500 florin den un lumpsum. "E verspreiding di e 1500 ta over di 3 aña. E trahadonan por bisa con nan kier e. Esey mi ta laga na FTA pa onderhandel cu e miembronan" Kooyman a bisa. Segun e gerente ta importante pa mustra cu e ta de facto hopi mas cu loke cu e compania tabata dispuesto pa paga. "Pero nos ta compronde tambe cu un trahado mester ta contento ora cu e ta trahando bek riba vloer. Un trahado contento kiermen cu e cliente tambe ta contento" Kooyman a sigui bisa. Segun Kooyman, loke ta importante ta cu den futuro nan no ta bay papia mas di un aumento structural. "Anto esey ta un game changer. E ta algo cu ta redelijk nobo pa Aruba pa e siguiente CAO gesprekken den futuro" Kooyman a sigui bisa. E ta considera esey algo cardinal den e combersacionan. E ta admiti cu ta algo cu e compania a exigi, pero e ta tambe un cambio den e pensamento di e sindicato. A mustra cu den e caso aki, tur dos partido a entrega pa por a yega na e acuerdo aki. 

E TRANSCURSO DI E NEGOSACION

E forma con cos a bay tabata interesante. E reunion cu mediado a cuminsa pa 7'or y a dura te 9'or y mei sin cu partidonan a haya otro. Pero mirando e importancia di e caso, a sigui un sin fin di yamada pa otro y algo te casi marduga, e acuerdo a bin. Sinembargo mester a presenta e acuerdo na e trahadonan. Algo cu FTA a haci awe mainta tempran cu e trahadonan. Y aki e trahadonan a bay di acuerdo y a reanuda trabou pa 9'or.